photo from you tube

Isumat.com/Pebrero 9, 2023

Hala….segi…sunluga niyo an waray mga partner o zero-lovelife kay ha usa nga bungto ha probinsya han Quezon, makakabulos ngan buwenas an waray jowa nga mga empleyado han LGU kay triple pay hira ha Valentines Day, bootsidngon an kantidad han sweldo in x3 hito nga adlaw basta sumulod hira ha trabaho.

Hi Mayor Matt Erwin Florido han LGU-General Luna, Quezon in nag-anunsyo hadin Lunes nga an mga empleyado han ira munsipyo nga waray nagin oyab tikang han katawo in makarawat hin triple pay kun sumulod ha trabaho ha adlaw han paghigugma.

Amo gihapon ini an bonus nga maaagoman han waray oyab o partner han nag-agi nga lima ka tuig, sering pa ni Florido.

Kun ini nga waray mga jowa nga empleyado in deri sumulod han Lunes, Pebrero 13, makarawat hira hin double pay kun sumulod ha trabaho hit Pebrero 14.

Sumala pa han report han GMA News, an kwalipikado nga intresado han benipisyo in kinahanglan magsubmiter han ira aplikasyon ha Mayor’s Office o ha Human Resources Office. Ini nga aplikasyon in hingpit nga papanginanoon basi mapamatud-an nga waray gud jowa. Sanglit kinahanglan magin tangkod an karuyag mag-apply, sering ni mayor.

Ginklaro naman ni Florido nga an pondo in deri tikang han LGU, kundi tikang ha iya personal nga paningkamot. Ini in kaparte han iya tinatawag nga innovative governnance.

Iya igindig-on nga kinahanglan malipayon gihapon an mga single ha Valentines Day ngan iya ginhihingyap nga makabiling hira hin ka-partner ha maabot nga mga panahon.

Ini nga programa han alkalde an iya gintikangan han una nga tuig ug iya plano nga kada tuig na ini kun hiya la gihapon an mayor. #