Isumat.com/Hulyo 5, 2023
Tungod han baseball, nagtikalamrag an kabubwason para hin duha nga batan-on ha Pambujan, N. Samar nga na-recruit nga magin kaapi han varsity teams hin mga unibersidad ha Metro Manila.
Amo ini hira Kurt Cabanillas ngan Hilario Espina III nga magradwar tikang ha Senior High School ha ira bungto.
Hi Espina in magigin kaapi han National University Bulldogs, samtang hi Cabanillas in magigin miembro han Adamson University Falcons. Hira in magigin varsity scholars han tagsatagsa nga unibersidad nga nakikiglantugi ha mga torneo han Universities Athletic Association of the Philippines (UAAP).
Hinsabutan gihapon nga hi Espina in ginkumbida nga mag-try out para han National Team 20-Under.
(Kurt Cabanillas)
Ha pakighimangraw han Isumat.News kan Pambujan Coach Mon Espina, dako hin duro an mabubulig han scholarship kay libre an ngatanan nga kagarastusan ha eskwela ngan pag-ukoy ha Manila nira Cabanillas ngan Espina III.
An mga scouts han mga unibersidad ha Manila an nakakita han kamagkarit han duha nga mga batan-on dida han mga national tournaments nga ira gin-apihan.
An Pambujan in kilalado nga poderoso ha baseball tikang pa han dekada 70 kun diin kadam-an na nga Pambujanon an nagin miembro han national team ngan nagin varsity scholars hin kadam-an nga unibersidad ha Manila.
Hi Coach Mon nga nagin professional baseball player ha Estados Unidos in dako an kontribusyon han pagpadukwag han baseball ha Pambujan.
Ha deri pala maiha, an baseball team han Pambujan an nag-qualify para han 2023 Palarong Pambansa ngan hira an magtataglawas han Eastern Visayas dida han nasabi nga paisan-isan ha Marikina City hiton Agosto. #
