Isumat.com/Setyembre 14, 2023
Waray paltos ngan segurado nga makakalingkod ha pwesto an mga tigsering han 19 ha 20 nga barangay ha Matuguinao, Samar ha tiarabot nga Barangay & Sanguniang Kabataan Eelections (BSKE) hiton Oktubre 30, 2023.
Ha pakighimangraw han Philippine News Agency kan Matuguinao Mayor Aran Boller, nagsumat an alkalde nga waray ka-atbang dida han piniliay an mga kandidato pagka kapitan, SK chairman ngan mga miembro han konseho ha mga barangay han munisipalidad.
Nag-esplikar hi Boller nga iya gintirok an ngatanan nga intresado pagkandidato ngan nagka-urusa hira nga mamiling hin paagi basi maseguro nga mamurayaw ngan waray samok ha ira bungto dida han eleksyon.
Nagka-uruyon an ngatanan nga nadadabihan nga tag-usa nala an madalagan pagkakapitan, SK chairman ngan unom nga kagawad kada barangay. Pinaagi hini, magigin hapsay ngan waray insidente hin bayolente an piniliay, sering pa ni Boller.
Dida han 20 nga barangay han Matuguinao, an Brgy San Roque la an may magkakasurapo pagka chairman. Hinsabutan nga an mag-aagaw han mao nga posisyon in usa nga amay in sundalo ngan iroy hin miembro han New Peoples’ Army (NPA).
Nagsering hi Boller nga pamaagi ini han mga rebelde nga kumunista basi utro ma-impluwensyahan nira an mao nga barangay, amo nga dumalagan hi Juana Loyogoy nga nanay hin rebelde. Igkaka-banggaay ni Loyogoy hi Santos Verano nga tatay hin kaapi han Philippine Army.
Ha report han Philippine News Agency, an Brgy San Roque in harani ha pag-ultan han Samar ngan Northern Samar ngan nagmamalahimo an NPA nga utro makontrol an mao nga barangay.
Hadton nakalabay nga katu-igan 12 han 20 nga barangay han Matuguinao an ginkontrolar han NPA.
Kasumpay hini, nagpasabot an Samar PNP Provincial Office nga magdudugang hira hin pwersa han kapulisan ngadto han mga barangay ha Matuguinao nga may hulga ha seguridad bisan kun waray karibal an mga kandidato. #
