Isumat.com/Setyembre 29, 2023
Iginpatanggal na ha listahan han mga tinaglawas ha Kamara de Representantes an tinaglawas han An Waray Partylist.
Dida han sesyon han kongreso hadin Mierkules, Setyembre 27, naghimo hin pitad an mga kongresista nga lukbahon na an ngaran han An Waray ha libro han kongreso.
Hi Deputy Majority Leader Jeanette Garin an naghimo han mosyon nga nagmamando han Congress Secretary General nga ig-implementar an pagtanggal han tinaglawas dida han listahan han kongreso.
Ini nga pitad han mga magbabalaud in pagsunod han desisyon han COMELEC En Banc nga kanselaron an rehistrasyon han mao nga party-list.
An pitad ni Garin an iya iginpatamak han final judgement han Comelec hini nga isyu. Waray rumiwa an mga kongresista hini nga mosyon ni Garin.
Pira na ka bulan an nakalabay, an Comelec Second Division in nagdesisyon nga kanselaron an rehistrasyon han partido kay nakatalapas hira han balaud han eleksyon. Ini in tungod kay ginpalingkod han An Waray hi Victoria Isabel Noel ha kongreso bisan waray iginpagawas nga Certificate of Proclamation an Comelec para ha iya.
Ini nga desisyon han Division an igin-apilar han partido hadton Hunyo 6 kay para ha ira, waray ginbabasaran an desisyon han 2nd Division.
Pero hadton Agosto, an Comelec En Banc in nagbasura han Motion for Reconsideration.
Hi Florencio “Bem” Noel an naglingkod yana nga tinaglawas han party-list ha Lower House.
Tobtob han ginsusurat ini nga notisya, waray pa opisyal nga pahayag an party-list kun ano an ira reaksyon o hihimoon nga pitad kasumpay hini nga gi-os han kongreso. #
