Isumat.com/Hulyo 26, 2023
Ginbanabana nga sobra hin 4 milyones pesos an kantidad han mga propyedadis nga nadanyos han masunog an ikaduha nga andana han balay han alkalde han Can-avid, E. Samar hadton Hulyo 17, 2023.
Ha inisyal nga report han Bureau of Fire Protection han mao nga bungto, porlomenos 4.5 milyones pesos an balor han mga naugbaw nga parte han balay ngan personal nga mga higamit ni Mayor Vilma Germino.
Subay pa han BFP, an kalayo dida han balay nga namumutang ha Brgy 7 in posible nga “faulty electrical wiring” an kawsa.
Alas 4:50 han maagahon han ma-obserbaran han umagad nga lalaki ni Germino nga nag-aaraso an stock room ha ikaduha nga andana ngan nadiskubre nga nagkakalayo na ha sulod hini nga kwarto.
Kadagmitan nga nagkagawas han balay hira Germino ngan nagresponde an mga bumbero tobtob nga naparong an kalayo alas 6 han aga.
Waray nahireport nga nagkaada hin injuries dida han nasabi nga insidente ngan waray ka-alakbati han kalayo an 1st floor han balay nga hinimo-an hin konkreto nga materyales. #
