Isumat.com/Hulyo 26, 2023
Waray magpahawid in usa nga lalaki han pagpaninigbas hin usa nga para-uma, sanglit waray nahimo an pulis nga anak han gintitigbas kundi an pusilon an suspetsado rason han kamatay hini ha San Roque, Northern Samar hadton Hulyo 23, 2023.
Ha report han PNP Regional Office, ginkilala an namatay nga suspek hin panigbas nga hi Renel Notarte, 41 anyos, inasaw-an ngan nag-uukoy ha Brgy Lao-angan han mao nga bungto.
An pulis nga nagpusil kan Notarte in ginkilala nga hi Patrolman Eric Jude Estrada, 25 anyos, ulitawo, PNP member ngan naka-assign ha PNP Mobile Force Company. An nasamaran tungod han panigbas in ginkilala nga hi Romeo Estrada, 51 anyos, ngan amay ni Patrolman Eric Jude. An magtala-amay in residente gihapon han nasabi nga barangay.
Ha imbestigasyon han kapulisan, hadton Hulyo 22, hi Notarte in sinuntok ni Romeo Estrada tungod hin waray nira pagka-asyahi nga isyu.
Hadton Hulyo 23, nakatalaan unta nga pagtuhayon hira han barangay officials. Pasado alas 8 han aga hini nga petsa, nakit-an ni Notarte hi Romeo nga nagbabaktas upod in usa nga barangay tanod.
An suspek in kadagmitan kumuha hin sundang ngan ginlanat ngan ginpapanigbas an biktima.
Mayda nakagsumat kan Eric Jude han panhitabo ngan deretso hiya pumakadto han lugar ngan iya nakit-an nga gintitigbas an iya amay. Nagpakilala hiya nga pulis ngan ginhawiran hi Notarte basi kumalma na ini, pero nagpadayon hin panigbas an suspek ha amay han pulis.
Waray na nahimo an patrolman kundi pusilon hin pira ka beses hi Notarte nga nagin rason han kamatay hini ha lugar han panhitabo.
Gindara ha hospital an amay han pulis basi tambalon an mga kasamdan tungod han panigbas, samtang hi Eric Jude in boluntaryo sumurender ha San Roque PNP ngan igintubyan an iya service firearm.
Nakuha han mga imbestigador tikang ha lugar han panhitabo in usa nga sundang ngan upat nga basiyo hin bala.
Nagpapadayon pa gihapon an kadugangan nga imbestigasyon han nasabi nga panhitabo. #
