Isumat.com/Agosto 2, 2023
Waray laboratoryo hin droga ngan waray gihapon narekupo nga illegal drugs an mga otoridad han pagdumara-on an inspection ha Tacloban City Jail Male Dormitory hadton aga han Hulyo 29, 2023.
Hi Tacloban City Jail Warden Gusser Gadong in nagsumat nga ginpanginano hin hag-id han mga personales han Tacloban City PNP ngan Bureau of Jail Management an bug-os nga facilidad ngan waray nadiskubre o nakuha nga iligal nga droga.
Pero nagpabati hin kabido hi Gadong ngadto han mga preso kun kay-ano nga nagpakalusot an igindederi nga mga bagay sugad han cellphones, Tablet, ngan pocket Wi-fi nga mayda man unta cellphones nga puede gamiton han mga inmates.
Nabibido gihapon an opisyal nga waray igdeklarar han mga bilanggo nga mayda nira gintago nga salapi nagkakantidad hin 1.3 Milyones pesos.
Ginklaro ni Gadong nga puede tagan hin kwarta an mga preso tikang han nabisita ha ira, pero ini in tobtob la ha 3 syentos pesos kada adlaw. Mayda gihapon iba nga nakakagnegosyo ha sulod han karsel ngan gintutugutan ini.
An problema kay waray magpasabot an grupo han mga preso nga mayda nira pondo ngan gintago pa ini hin sekreto ngan nasabtan la dida han inspection.
Antis hini, nakasagap hin impormasyon an BJMP nga may nagpapakalusot nga kontrabando tisulod ha City Jail, sanglit nangaro hira hin ayuda ha Tacloban PNP basi magdumara han Operation Greyhound inspection.
Iginbuyagyag gihapon ni Gadong nga duro na hin kadaan an facilidad ngan nangugutak na ngani an mga semento ha sulod han karsel.
An gobyerno han Tacloban in nagdonar na hin lote ha norte nga dapit han syudad basi tindugan han bag-o nga City Jail, pero an pagtukod han facilidad in waray pa kapopondohi han BJMP Central Office.
Hapagkayana, an City Jail nga namumutang ha Paterno St Extension in gin-uukoparan hin sobra 500 nga mga bilanggo. #
