Isumat.com/Agosto 2, 2023
An Regional Executive Director han Department of Environment and Natural Resources ug an nangungulo han Environmental Management Bureau (EMB-DENR) ha Rehiyon Otso an iginbalhin ngadto ha iba nga lugar.
Subay han Special Orders nga pirmado ni DENR Secretary Antonia Yulo-Gonzaga, petsado Hulyo 6, 2023, hi Regional Executive Director (RED) Arturo Fadriquela in iginbutang komo OIC han DENR Zamboanga Peninsula (Region 9), samtang hi hi EMB Director Jose Despi an iginbalhin ngadto ha Central Luzon Region.
An bag-o nga RED han DENR-Eastern Visayas amo hi Lormelyn Claudio, samtang hi Wilson Trajeco an Regional Director han EMB ha aton dapit.
Antis hini nga pagbarubaraha han mga opisyales han DENR, hi Leyte 4th District Congressman Richard Gomez in mahugot an panawagan kan Yulo-Loyzaga nga igbalhin ha iba nga rehiyon an pira nga nangungulo han ahensya ha Rehiyon Otso.
Sumala kan Gomez, kinahanglan igbalhin na ha iba nga lugar an nasabi nga mga opisyal kay mayda na hira “over familiarity” ha mga lokal nga panggobyernuhan sanglit posible nga nakikigkuntsaba o natugot hin iligal nga mga binuhatan nga nagigin kawsa han distroso han natural nga kalibungan ha probinsya han Leyte.
Hira Fadriquela ngan Despi in lakip han mga opisyales han DENR nga ginpa-atender ngan ginpa-esplikar durante han congressional inquiry han gin-aalegar nga polusyon ha katubigan ngan katunaan ha Ormoc Bay durot han operasyon han DBSN Farms Agriventures Corporation.
An mao nga dressing plant hin manok an gin-alegar han kongresista nga nakadarahig han katubigan ha Albuera tungod han solid waste discharge, ngan deri otorisado nga pag-ukad han tuna ha Brgy San Joaquin, Palompon, Leyte nga paglulubngan han baya tikang han pabrika.
An nasabi nga pabrika o planta in gintatag-iyahan han pamilya ni Palompon Mayor Ramon Onate. An alkalde in mahugot nga nagpanhimuwa han mga alegasyon ni Gomez durante han hearing ha kongreso ngan mga pahayag ha media.
Tobtob han ginsusurat ini nga notisya, waray impormasyon an IsumatNews kun ini nga pagbalhin han mga opisyales han DENR ngadto ha iba nga rehiyon in may kalabutan han hangyo ni Gomez han sekretaryo han departamento.
Hi Gomez in nagpahayag nga deri pa tapos an hearing ha kongreso ngan mayda pa niya igpepresentar nga kadugangan nga ebidensya pagpadig-on han iya alegasyon.
Nagdidig-on naman an kampo ni Onate nga waray natatalapas nga balaud ha kalibungan an iya planta, ngani gin-isyuhan pa hin ISO Certification an nasabi nga facilidad, nagpapakita nga tuhay an operasyon hini.#
