Isumat.com/Hunyo 9, 2023
16 nga teams tikang ha magkalainlain nga mga lugar ha Eastern Visayas an magpapagibogibo para han korona han 2023 Sangyaw Cup Inter City/Town Basketball Tournament ha Tacloban City Astrodome hiton Hunyo 11 – 17, 2023.
An Team Tacloban in andam na surapo-on an iba nga mga hugpo nga madayo para han nasabi nga torneo.
Sumala han tag-organisar han kompetisyon, an 16 nga entries in pagbabatagbatagon ngadto hin upat ka brackets kun diin tag-upat ka teams an kada bracket.
Single Round robin kada bracket an magigin sistema ug an Top 2 ha kada bracket an makakasulod ha quarterfinals o Top 8. Dida hini matutudlok an semifnalists ug an magkaka-engkwentro para han kampeonato.
An mga teams nga mapartisipar amo an Tacloban City, Baybay City, Catbalogan City, Palo, Tanauan, Dulag, Burauen, Julita, Capoocan, Alangalang ngan Pastrana.
Makikig-asdangay gihapon an Marabut, Hinabangan ngan Paranas tikang ha Samar; ngan Llorente ug Hernani han Eastern Samar.
An magigin kampeon in makakadaug hin 100,000 pesos, samtang an 2nd placer 50,000 ngan 3rd placer 30,000.
Mayda lima tobtob ha unom ka oyag an masasaksihan kada adlaw ngan an murumlay in magtitikang alas 9 han aga kada adlaw.
Nagsering an organizers nga tag 20 pesos an entrance fee para han karuyag magkita.
An nasabi nga torneo in ginsusuportaran han Tacloban City Government, Tacloban City Sports Office, Hiraya Tacloban ngan Aktibong Basketbolista Development Academy (ABDA). #
