Isumat.com/Hulyo 24, 2023
Duha ka tawo an naawat an kinabuhi ngan tulo pa nga iba an nag-antos hin mga kasamdan ha magkabulag nga makangingirhat nga insidente pero konektado ha tagsatagsa hadton maagahon han Domingo, Hulyo 23, 2023 ha Sogod ngan Tomas Oppus, Southern Leyte.
Ha nahikay nga impormasyon han IsumatNews tikang ha Sogod PNP Station, ginkilala an mga biktima nga hira Susana Sagaldia 39 anyos; Loreto Sagaldia, 45 anyos; Jayson Sagaldia, 18 anyos, ngan Genalyn Sagaldia, 17 anyos. Hira in mga residente han Brgy San Roque, Sogod, Southern Leyte.
Hi Susana in namatay, samtang an iya mister nga hi Loreto ug mga anak nga hira Jayson ngan Genalyn in nag-antos hin mga kasamdan tungod han pag-atake han suspetsado gamit in usa nga parakol.
Ha luyo nga bahin, an gintatahapan nga nagbuhat han krimen ngan nagpakamatay katapos han insidente amo hi Albert Escabosa, 47 anyos, may iginkakalungon ngan naukoy ha Brgy Tinago, Tomas Oppus, Southern Leyte.
Ha imbestigasyon han Sogod PNP, hira Susana ngan Albert in may relasyon bisan kun an babaye in inasaw-an na ug an lalaki in may ka live-in partner. Nagka-oyab an duha samtang nagtatrabaho ha abroad an mister han babaye.
Katapos han kontrata ha abroad, bumalik an mister ha iya pamilya ha Sogod, pero gintutudlok nga posible nagpadayon la gihapon an relasyon han iya misis ug an suspetsado.
Dida han banda alas 3 han maagahon han Domingo, ginsulong ni Albert an panimalay han pamilya Sagaldia ngan ginpaninigbas an mga biktima gamit in usa nga parakol. Hinsabutan pa nga burod hin tulo ka bulan hi Susana
Ha report han Tomas Oppus PNP, alas 4:39 han maagahon hadto nga petsa, natad-an nga nabitay an patay nga lawas ni Albert ha gawas han ira balay ha Tomas Oppus.
Dida han imbestigasyon, hi Albert in lumakat tikang ha ira balay ala 1 han maagahon hadto nga petsa.
An suspetsado in naka-bonnet han umatake ha pamilya Sagaldia, pero an mga anak an nagtudlok kan Albert nga amo an nagpaninigbas ha ira tungod han sul-ot nga tshirt han suspetsado nga amo an nakit-an nga amo la gihapon an sul-ot niya han iya paghikog.
Ini nga mga panhitabo in padayon gin-iimbestigar han mga otoridad. Waray nakit-an nga suicide note an mga kapulisan kasumpay han natabo nga pag pakamatay.
