Isumat.com/Pebrero 9, 2023

Samtang nagpapadayon an pangalantas nga makabiling pa hin kadam-an nga survivors han magnitude 7.8 nga linog nga nakadagmal ha Turkey ngan Syria, umabot na ha 12, 200 katawo an kumpirmado nga namatay tungod han makangingirhat nga trahedya.

Ha report han CNN, Pebrero 9, 2023, ginkakabarak-an nga madudugangan pa ini nga ihap kay yinukot-yukot pa an nagkakawagra ngan gintotoohan nga nadat-ugan han nagkarurun-og nga mga buildings. Ini in labot la han duro hin kadamo nga aada yana ha kritikal nga kahimtang tungod han injuries nga ira gin-aantos.

Lunes han maagahon han matabo ini nga linog kun diin an nagin sentro in didto ha probinsya han Nurkhak, Turkey. An mga nasud han Turkey ngan Syria in magsapit la.

Labot la han linog, naduroy pa gud an duro kamatugnaw nga klima didto han lugar nga nakakapalangan han panlimbasog han mga rescuers.

Usa gihapon nga problema kay an nasud Syria in masamok kay may mga pwersa hin rebelde nga nagkokontrolar hin pira nga mga lugar.

70 nga mga nasud ngan 14 nga international organizations an nagpatapod nga mabulig hira han kabutangan didto han duha nga nasud.#