Isumat.com/Hunyo 7, 2023
Ha deri maiha nga panahon, an mga mulopyo han Carigara, Leyte in deri na mapakadto ha mga opisina han Social Security System (SSS) para maka-agom han serbisyo han ahensya, kay ini in matatagamtaman didto na mismo ha ira tagsatagsa nga barangay.
Kakulop, Hunyo 6, 2023 an SSS-Tacloban Branch ug an mga kapitan han 49 nga barangay han Carigara in nagpirma hin Memorandum og Agreement (MOA) para iglunsad an E-Center sa Barangay Program han ahensya.
Panuyo hini nga an mga serbisyo han SSS in dad-on ngadto mismo harani han bungsaran han mga miembro ug mga beneficiario ha ira mga barangay. Lakip denhi an pag-file han mga benefit claims, contributions, loan filing ngan iba pa.
An kada barangay in magtutudlok hin indibiduwal ha ira lugar nga igpapailarum hin training han SSS. Ini nga barangay personnel an tututdu-an han SSS han mga pamaagi basi makabaton ngan maka-asister han mga ka-barangay nga mapakadto ha SSS E-Center sa Barangay.
An nasabi nga SSS E-Centers in abri ha mga barangay 24/7 kun magin operational na ini.
An nasabi nga okasyon in gin-atenderan nira SSS Commissioner Jose Julio, Central Visayas II Vice President Mario Corro, Tacloban Branch Head Lilibeth Cajucom, Carigara Mayor Ed Ong Jr, Carigara ABC President Romeo Nivera, iba pa nga mga opisyales ngan empleyado han SSS ngan mga kapitanes de barangay han municipalidad.
Ini nga aktibidad an gisasyahani ha kasaysayan han ahensya kun diin an ngatanan nga barangay hin usa nga bungto in umapi han pagpirma han MOA kaupod an SSS.
Iginpasamwak gihapon han SSS nga mapakadto an ira mga personales ha mga barangay ha Carigara para magpadangat hin serbisyo.
Gin-aaghat gihapon han ahensya an iba pa nga mga LGU nga makigsumpayan ha ira para hin sugad hini nga aktibidad basi makabulig ha ira mga nasasakupan nga magin masayon an paka-agom han mga benefecio tikang ha SSS.#
