Isumat.com/Hunyo 24, 2023
An “City of Beautiful People” in pananaglawasan hin tulo nga mag-anyag nga beauty queens tikang han syudad para hin mga prestihiyoso nga National Pageants.
Ini an nasabutan katapos la han engrande nga Coronation Night han Miss Ormoc 2023, Hunyo 23 han gab-i ha Ormoc Superdome kun diin gintambungan ini hin bantuganan nga mga personalidad ha pulitika, negosyo ngan showbiz.
Dida han garboso nga okasyon, napili nga Miss Ormoc 2023 hi Shaan Morata nga nakakuha hin premyo nga 100 Mil pesos, korona balor hin 50 Mil pesos ug hiya an marepersentar han syudad ha 2024 Miss Grand Philippines.
Ha luyo nga bahin, an 1st Runner-up nga hi Monette Mangcal an makikiglantugi ha Mutya ng Pilipinas 2024. Naka-agom gihapon hi mangcal hin 50 Mil pesos nga premyo.
Samtang, an nagtubyan han korona nga Miss Ormoc 2022, Liezle Jones, an makikigpa-isan-isan para han titulo han 2024 Miss World Philippines.
An nagin 2nd runner-up amo hi Apryl Siaboc, may premyo nga 40 mil, 3rd Runner-up Rio Anne Ronato – 30 mil; ngan 4th Runner-up Rafa Fernandez may premyo nga 20 mil pesos.
20 nga mga magbaysay nga kandidata tikang ha magkalainlain nga lugar han Ormoc an naglantugi para han korona.
An primyado nga actor-singer Piolo Pascual an special guest han okasyon kun diin pira ka beses nga nag-alay hiya hin mga awit ngadto han mga kandidata.
Nagin host naman hira actress Izza Calzado ngan TV Host-Motorist Vlogger James Deakin.
Personal nga ginpasalamatan nira Leyte 4th District Rep. Richard Gomez ngan City Mayor Lucy Torres-Gomez an mga indibiduwal ngan mga grupo nga nagburublig basi magin malinangpuson an okasyon. An magtia-ayon nga Gomez in nagsaad gihapon nga deri hira mahunong pagpaka-upay han syudad ug an kahimtang han ira nasasakupan nga katawhan.
Gintambungan gihapon an nasabi nga koronasyon han mga opisyales han konseho han syudad ngan kilalado nga indibiduwal ha Ormoc.
Nagdugang han karisyuhan an mga pasalida hin eksperto ha magic, mga acrobats, rappers ngan dance group.
Ini nga aktibidad in kaparte han pagsa-urog han syudad ha kapistahan nira San Pablo ngan San Pedro nga an katungtungan in Hunyo 29.
