Isumat.com/Hunyo 24, 2023
Posible nga magdeklarar hin diarrhea outbreak ha Llorente, E. Samar tungod han sobra usa ka gatos nga indibiduwal nga nag-antos han nasabi nga sakit yana nga bulan han Hunyo.
Nagsering an Department of Health-Eastern Visayas nga maabot hin 138 katawo an natapnan han diarrhea ha 12 nga barangay han mao nga bungto. Pero ginklaro han mga otoridad ha panlawas nga kinahanglan pa hin kadugangan nga ebidensya antis madeklarar nga may outbreak hini nga sakit didto han bungto.
Sumala han notisya han Philippine News Agency , an DOH-Region 8 in nagpahayag nga kasagaran han mga nagkatatapnan in nagpakita hin sintomas kun diin 22 an nagpa-admit ha mga hospital, samtang an iba in nagpa-upay ha ira tagsatagsa nga balay.
Dida han mga na-ospital, 4 ha ira an positibo han cholera kataliwan igpailarum ha rapid testing.
An apektado nga katawhan in nagtitikang ha masunod nga mga barangay : Antipolo, Bacayawan, Barobo, Magtino, Piliw, San Miguel, So-ong, Tabok ngan 8, 11 ngan 12.
Gintutudlok han DOH nga posible kontaminado nga tubig an nagin rason han pagsarang han kagaw. Na-Obserbaran han mga otoridad nga mayda pa waray mga kasilyas ha mga residente ug didto la ha salog nagpapagawas han ira baya ug dida han salog nanhuhugas han ira mga gamit ha pagkaon an iba nga residente.
Hapagkayana, bisan kun gulpi an sintomas han iba, naghihingita pa hin kadugangan nga ebidensya antis madeklarar an outbreak han mao nga sakit didto han munisipalidad.
An mga sintomas han diarrhea in naglalakip han pag-ul-ol han tiyan, ngan tubigon nga baya, sugad man sukot-sukot an pagkadto ha kasilyas.#
