Isumat.com/Hunyo 24, 2023
Nahipaslak ha karsel ngan maatubang hin mga kaso an usa nga kagawad hin barangay han ma-aresto hiya ha anti-illegal drugs operation han mga otoridad ha Paranas, Samar kakulop, Hunyo 23, 2023.
Ha report han PDEA-Region 8, ginkilala an suspetsado nga hi Ruel Nadela alyas Bungal, ginkokonsiderar nga High Value Target han mga otoridad ngan hiya in barangay kagawad.
Nahitabo an pag-aresto dida han buy-bust operation nga gindumara han Samar PNP Provincial Office, Paranas Municipal Police Office ngan PDEA-Samar Province pasado alas 9 han gab-i ha Brgy Buray han nasabi nga bungto.
Narekupo tikang han suspek in pira ka sachet hin gin-aalegar shabu may timbang nga 2 gramos balor hin 15 mil pesos.
Ha iba nga operasyon kontra droga, lima ka tawo an nadakop ngan gintotoohan nga nabungkag in usa nga drug den ha Sitio Rawis, Brgy Guirang, Basey, Samar.
Ini in pinaagi han buy-bust operation nga natabo ala 1 han kulop, Hunyo 22, 2023 ha nasabi nga lugar kun diin nasikmit an mga gintatahapan nga hira Jonny Galangue, nagdudumara han drug den; ug an mga bisita niya hadto nga takna nga hira Michael Medoranda, Kim Lobetana ngan duha nga menor de edad.
Nakumpiskar tikang ha mga suspetsado in 13 ka sachets hin gintotoohan nga dahon hin marijuana maya timbang nga 5 gramos ngan kantidad hin mil pesos.
An mga suspek in sasampaan hin kaso ngan yana temporaryo detinido ha Basey Municipal Police Station. #
