Isumat/Hunyo 26, 2023
“Unta madayon. “
Ini an malina-umon nga kabatunan ni Borongan City Mayor Jose Ivan Dayan Agda han paki-anhan hiya han mga kaapi han media kun ano an iya reaksyon han utro nga pagproponer han mga lideres han Singbahan Katolika nga magmugna hin Samar Island Region nga mabulag ha Eastern Visayas Region.
Nag-esplikar hi Agda nga dako hin duro an mabubulig hini nga pitad pagpadukwag han kabutangan han tulo nga probinsya ha isla han Samar labi na an pagbakdaw han katawhan tikang ha kapobrehan.
Iginkumparar han alkalde an kabutangan han Leyte ngan Samar kun diin sering niya, klaro gud nga kablas an isla han Samar. Harayo hin duro an Samar Island kun paghihimangrawan an sitwasyon ha ekonomiya bisan kun an Samar an ikatulo han gigdadagku-i nga isla han nasud.
Tim-os an suporta ni Agda han proposisyon han mga obispo kay matatagan hin bastante nga pondo an Samar Island kun maglugaring komo usa nga rehiyon.
Kadungan hini, nanawagan hi Agda ha national government ngan natutungdan nga mga ahensya han gobyerno nga unta pamati-an ini nga hingyap han mga obispo ngan magkalainlain nga sektor ha Samar basi magkaada hin hingpit nga pag-istudyo han nasabi nga proposal.
Naglalaum gihapon hi Agda nga susuportaran ni House Minority Leader ngan 4Ps Partylist Rep. Nonoy Libanan ini nga proposal kay segurado nga magdudurot ini hin pagdig-on han ekonomiya ha nasabi nga lugar.
Antis pa hini, hi Eastern Governor Ben Evardone in nagpabati han iya suporta hini nga hangyo han mga lideres han Singbahan Katolika ha tulo nga probinsya han isla han Samar. #
