Isumat.com/Hunyo 27, 2023
Tungod han paghimakuri ha pakigsurapo ha mga otoridad ngan hingyap hin mamurayaw nga kinabuhi , lima nga mga kaapi han kumunista nga New Peoples’ Army tikang ha Samar ngan Leyte an bumalik ha piyod han balaud.
Ha report han PNP Regional Office, tulo nga NPA rebels an nagsurender tungod han paningkamot han Calbia, Samar PNP Station ngan 802nd PNP Mobile Force Company. Natabo ini hadton Junyo 25, 2023.
An tulo nga anay kaapi han rebelde nga grupo in nagtubyan gihapon han ira mga armas ngan nagsaad nga makikigbinuligay ha gobyerno basi mapukan na an insurhensya ha Samar.
Ha luyo nga bahin, sumurender an duha nga rebelde nga NPA ha Leyte PNP Provincial Office han pareho nga petsa.
Hira in nagtubyan hin kalkibre 38 nga pistola, granada ngan mga bala.
An mga tinubyanan han balaud in naghatag na han inisyal nga ayuda ngadto han mga nagsurender ngan kadagmitan nga aareglarun an mga dokumento basi hul-os nira matagamtaman an iba pa nga benipisyo para han mga rebel returnees. #
