(File photo flood.control.asia)

Isumat.com/Enero 25, 2023

Bisan kun pira na ka beses nga nakanselar o nasuspender an mga klase tikang kindergarten tobtob senior high school ha Rehiyon Otso tungod han mga pag-uuran ngan pagbabaha, deri na papahilawigon an klase.

Ini an iginpahayag ni Jasmin Calzita, tagpamulong han Department of Education Regional Office ha pakighimangraw han iFM-RMN Tacloban, kakulop Enero 24, 2023.

Hi Calzita in nagklaro nga mayda palisiya an DepEd nga kun may mga kanselasyon han klase tungod hin mga kalamidad, an nasusuupender la amo an on-line classes ngan in-person classes, pero deri suspendido an iba nga modalities han pagtutdo sugad han modular learning.

Sumala ha iya, awtomatiko na para han mga magturutdo nga maghahatag han modules para amo ini an pagtrabahoon han mga estudyante ha panimalay, sanglit deri nahunong an pag-aram han kabataan.

Kasumpay hini, deri maa-apektaran an school calendar kay nagpapadayon man an edukasyon bisan kun waray didto ha eskwelahan an mga estudyante.

Tungod hini, utro gin-aghat ni Calzita an mga kag-anak nga buligan an ira mga anak kun may mga module activities kay dako hin duro an partisipasyon nira hini nga pamaagi hin pagtutdo. Ngani, deri na angay nga makalasan pa an mga kag-anak kay ginhimo na ini han nahingorosoos pa an pandemya han Covid-19, dugang pa ni Calzita.

An school calendar para han school year 2022-2023 in nagtikang Agosto 22 han una nga tuig ngan nakatalaan magtapos Hulyo 7, 2023.

Kun manunumduman, damo nga mga adlaw han yana nga syahan nga duha ka semana han Enero an nakanselar an mga klase ha magkalainlain nga parte han Eastern Visayas tungod han gulpi nga uuran ngan babaha durot han low pressure area ngan shear line.

Ha monitoring han DepEd, 54 nga mga eskwelahan ha bug-os nga rehiyon an apektado han pagbabaha kun diin damo an nadistroso ngan nagkikinahanglan hin pondo para han pagtukod hin bag-o nga classrooms ngan pag-ayad han puede pa aydon nga facilidadis. #