Isumat.com/Enero 24, 2023
Namatay in usa nga senior citizen nga babaye han pagbunobuno-on han iya anak kakulop han aga, Enero 23, 2023 ha Brgy Canramos, Tanauan, Leyte.
Ha interview han iFM-RMN Tacloban kan Tanauan Chief of Police, Capt Kemy Bas, an biktima in ginkilala nga hi Estrella Redona, 67 anyos; samtang an suspetsado ginkilala nga hi Dennis Redona 45 anyos, anak han biktima.
Ha inisyal nga imbestigasyon, natabo an insidente pasado alas 9 han aga ha panimalay mismo han biktima ngan suspetsado. Igin-alegar han nakabati nga amyaw nga sugadsugad hin nagkaada hin karigumok didto han balay han biktima ngan tigda nagmiringaw.
Dida han panginano han mga otoridad, hi Estrella in nag-antos hin 16 nga binun-an ha magkalainlain nga parte han iya lawas hinungdan han kamatay. Kadagmitan umiskapo an suspetsado ngan yana ginhahalpat han mga otoridad.
Han syahan nga report ngadto ha Municipal Rescue Team, kasering han kapamilya han biktima nga gin-atake ha kasingkasing hi Estrella, ngay-an pala damo nga mga binun-an an iya gin-antos. #
