Isumat.com/Enero 25, 2023
Ginseguro han Criminal Investigation & Detection Group (CIDG) Regional Field Unit, nga waray ma-aaguman nga espesyal nga pagtratar han anay kapulisan nga akusado han pagpatay kan Calbayog City Mayor Ronaldo Aquino.
Ini an iginpasarig ni LtCol Eric Huesca, lider han CIDG-RFU Eastern Visayas, kun diin aada ha detention facility han ahensya an siyam nga ex-PNP officers nga naatubang hin mga kaso nga murder ngan frustrated murder.
Ha interview han iFM-RMN Tacloban, nagsering hi Huesca nga bisan kun igkasi mga pulis an aada ha ira kustudiya, hingpit nga ira susundon an nakapatik ha balaud parte han pagkapot han mga detenido. Deri gihapon igtataya ni Huesca ug han iya mga personales an ira integridad ngan pagigin tangkod ha trabaho para la hini nga mga akusado.
Iginsumat han opisyal nga istrikto gud an pagpatuman han palisiya nga aadto gud ha sulod han selda an mao nga mga akusado. Pero iya ginklaro nga mayda halipot nga panahon nga iginhahatag ha ira nga makag-ehersisyo gawas han karsel.
Gintutugutan gihapon an pagbisita han ira tagsatagsa nga pamilya, upod na an pagdara hin pagkaon, dugang pa ni Huesca.
Nakikig-istorya gihapon an mga akusado ha ira mga abogado pinaagi ha telepono, pero natatabo la ini kun nabisita an ira pamilya nga amo an nagpapagamit han ira cellphone ha mga akusado. Ini nga mga gi-os in igintutugot han balaud labi na nga ginkokonsiderar pa hira nga inosente kay waray pa man desisyon an korte.
Iginpatapod gihapon ni Huesca nga mayda kapas an pwersa han CIDG-RFU 8 nga balabgan an bisan ano nga plano o pag-pruweba hin bisan ano nga grupo nga maka-eskapo o may himoon nga maraot ngadto han mga akusado.
Hapagkayana, naghuhulat an CIDG han magigin desisyon han korte nga igbalhin na ngadto han karsel han BJMP an mga akusado kay deri na dapat hira igkustudiya han CIDG kay natanggal na hira ha PNP. Ini in labot la nga kulang an pinansyal ngan logistics han hugpo para han padayon nga pagdetenir han mga akusado. #
