Isumat.com/Enero 13, 2023
Malipayon nga iginpasamwak ni Tingog Party List Representative Jude Acidre nga titikangan na an pagtindog han Samar Island Medical Center (SIMC) ha Calbayog City yana nga 2023.
Ha iya pakighampang ha mga kaapi han media kakulop, Enero 12, 2023, iginsumat ni Acidre nga an gobyerno in nag-alotaga hin 900 Milyones pesos yana nga tuig komo inisyal nga pondo basi tikangan na an konstraksyon han SIMC.
Iginpahayag pa han magbabalaud nga target han gobyerno nga matapos an pagtukod han hospital ha sulod hin tulo ka tuig, pero bisan kun deri pa makukumpleto an konstraksyon hini, puede na matikangan an paghatag han serbisyo medikal han SIMC antis matapos an 2024 kun andam na an iba nga facilidadis. Sering pa man ni Acidre, puede magkaada hin partial operations an SMIC sunod nga tuig.
Labot la han serbisyo medikal, an SIMC in makakaghatag gihapon hin kadugangan nga 20 Mil nga magigin empleyado han mao nga establisemento. Maghahatag ini hin oportunidad ha panrabahuan ha mga taga Samar ngan iba nga parte han Sinirangan Bisayas.
An SIMC in usa nga Tertiary Hospital nga may kapas hin moderno nga mga ekipahis ngan mga espesyalista ha panlawas nga maghahatag hin atensyon ngan pagtambal ha komplikado nga mga problema ha panlawas. Dako an mabubulig hini ha mga pasyente ha Northern Samar, Samar ngan Eastern Samar kay deri na hira mabiyahe ha Tacloban basi la magpatambal.
Magkakamay-ada hin 300-bed capacity an SIMC ngan ini in igpapailarum ha pagdumara han Department of Health.
Nagin balaud an pagtukod han SIMC pinaagi han paningkamot nira House Speaker ngan Leyte 1st District Congressman Martin Romualdez, Tingod Party List Representatives Yedda Romualdez ngan Jude Acidre ngan mga magbabalaud ha Samar ngan Northern Samar.#
