Isumat.com/Enero 12, 2023
Samtang nagpapadayon an pag-uuran ngan pagbabaha, nagtitikamo liwat an mga kinabuhi nga nawawara ha Sinirangan Bisayas tungod hini nga kalamidad.
Ini nga mga namatay in nadugangan hin usa nga kaapi han Philippine Army ngan usa nga para-uma han magkalulumos ha magkalain nga insidente ha Northern Samar.
Ha report han 8th Infantry Division Philippine Army, nalumos hi Corporal Jerry Palacio, residente han Mondragon, N. Samar ngan nakadestino 43rd Infantry Battalion.
Hadton Enero 9, hi Palacio in tikadto unta ha munsipyo han San Isidro basi maghatag hin report kasumpay han sitwasyon ha Brgy Happy Village kun diin namumutang an iya Patrol Base. Samtang nagtatabok han tulay ha Kilometer 6 han mao nga barangay, gindagmalan han makusog nga agos han baha an iya sinasakyan nga motorsiklo.
Ginbiling an sundalo han mga rescuers tikang ha Philippine Army, PNP ngan Coast Guard, ngan natad-an an iya patay nga lawas alas 8:30 han aga, Enero 11, 2023, ha Maou River, 3 kilometros tikang han urhi hiya nga nakit-an.
Iginpatapod han Philippine Army nga tatagan han kaangayan nga ayuda ngan benipisyo an pamilya ni Palacio. Ginsaluduhan gihapon han Philippine Army an pag-alay han kinabuhi han biktima basi makabulig han mga baryuhanon nga naperwisyo han kalamidad.
Samtang, didto naman ha bungto han Laoang, gintotoohan nga kalumos gihapon an rason han kamatay ni Roger Narca, 56 anyos, residente han Brgy Catigbi-an.
Natad-an an iya patay nga lawas didto hin usa nga umhanan nga ginbabaha. Subay han impormasyon, an iya balay in ginlunop han baha ngan igin-anod an biktima. # (with report from Northern Samar News and Information)
