Isumat.com/Enero 11, 2023
Tungod han alegasyon nga umato kontra han mga otoridad nga mag-aaresto ha iya, namatay in usa nga suspetsado hin pagbaligya han illegal drugs ha San Miguel, Leyte, Enero 10, 2023.
Ginkilala an namatay nga suspetsado nga hi Alejandro Tanega alyas Lapwa, nag-uukoy ha Brgy Libtong han nasabi nga bungto.
Pasado alas 4 han kulop, naghimo hin buy-bust operation an mga elemento han PNP Regional Drug Enforcement Unit, Leyte PNP PDEU, ngan San Miguel PNP Station ha Brgy Bahay, San Miguel.
Ha imbestigasyon, hi Tanega in naka-abat nga kapulisan an iya iginkaka-transaksyon, sanglit iya ginbunot an iya pusil ngan ginpabuthan an mga tinubyanan han balaud. Binulos an kapulisan ngan nag-antos hin mga igo hin bala an gintahahapan ha ulo ngan lawas. Dead on arrival hi Tanega ha Rural Health Unit.
Sumala pa han PNP spot report, nakuha han mga otoridad an kalibre 45 tikang han suspetsado, lakip an 18 ka sachet hin gintotoohan nga shabu ug an kwarta nga gingamit han transaksyon.#
