Isumat.com/Enero 16, 2023
Nag-antos hin minor injuries in walo ka tawo ngan may mga infrastraktura nga nadanyos ha bungto han Leyte, Leyte dida han 5.1 Magnitude nga linog kagab-i, Enero 15, 2023 kun diin an sentro in pira la ka kilometros an distansya tikang han mao nga lugar.
An nasabi nga mga biktima in nadara ha Rural Health Unit ngan gintagan han kaangayan nga medical attention.
Ha report nga nahikay han Isumat.com, an mga biktima in nahulugan hin mga butang tungod han pagbay-og nga natabo alas 9 han gab-i. Nahisumat gihapon nga may mga parte han tulay ngan kalsada an nagkaada hin gutak.
Mayda gihapon mga distroso ha sulod han singbahan han Immaculate Concepcion.
Kasumpay hini, igindeklarar ni Mayor Arnold James Isidoro nga waray klase ngan trabaho yana nga adlaw ha iya munisipalidad komo pagseguro han katalwasan han ngatanan. Ginbabanabana han Phivolcs nga magkakaada pa hin mga aftershocks han linog.
Iginpailarum na gihapon an bungto ha Code RED Alert kun diin an tanan nga personales han Municipal Disaster Risk Reduction and Management Office in magmonitor ngan magreport kada adlaw.
An mao nga mga personales an iginpasarang na ha magkalainlain nga barangay basi manginano han sitwasyon han mga mulopyo.
An mga opisyal han barangay ngan katawhan in ginsagdunan nga igreport dayon ha MDRRMO kun mayda pa kadugangan pa nga biktima basi dayon katagan han kaangayan nga aksyon.# (with info from An Imo Sangkay )
