Isumat.com/Enero 17, 2023
Waray kadayon an plano pagpakamatay hin 13-anyos nga babaye pero nagdurot hin karigumok ngan pagkabaraka ha kadam-an nga katawhan han iya pabuthon an pistola nga iya dara ha sulod hin usa nga eskwelahan ha Carigara, Leyte, alas 4:45 han kulop, Enero 16, 2023.
Ha spot report han Carigara PNP Station, an Grade 8 student nga estudyante han Holy Cross College of Carigara in nagpabuto ha sulod han campus ngan nagpruweba pagpusil han iya kalugaringon pero nahawiran ini han iya kaklase.
Dida han imbestigasyon, problema ha pamilya an nakagduso han menor de edad han iya plano. Iya ginkuha an armas han iya amay ngan nakalusot hiya pagdara hini ha eskwelahan.
An batan-on in syahan gindara ha Police Station ngan igintubyan ha kustudiya han Municipal Social Welfare Office para han kaangayan nga pagtimangno ngan disposisyon.
An armas de fuego in igpapailarum ha ballistic examination basi matudlok kun mayda ba hini kaangayan nga mga dokumento.
Kasumpay hini, nagpagawas naman hin opisyal nga pahayag an mao nga eskwelahan kun diin ira iginpatapod nga waray nahibang o nagkaada hin karamtan ha lawas dida hini nga insidente.
Nangaro gihapon hin pasaylo an eskwelahan tungod nga nalutsan hira han armas tisulod han establisemento, kadungan han pagseguro nga deri na ini mauutro.
Nananawagan gihapon an eskwelahan nga unta deri na magpinasarang hin deri tinood nga mga istorya an pira nga katawhan mahitutngod han panhitabo.#
