Isumat.com/Enero 17, 2023
13 nga mga miembro han New People’s Army an bumalik ha piyod han balaud han magsurender hira ha 801st Infantry Brigade han Philippine Army ha Brgy Fatima, Hinabangan, Samar hadin Enero 12, 2023.
Igintubyan gihapon han mga rebelde ngadto ha militar an ira mga armas.
Ha report han 8th Infantry Division, an mga nagsurender in kaapi han Bugsok Platoon, Sub Regional Committee Sesame han Eastern Visayas Regional Party Committee ha ilarum han pamuno ni Martin Colima alyas Antos nga nagi-os ha Pinabacdao, Calbiga ngan Basey ha Samar.
An ira pagsurender in bunga han paningkamot han lokal nga personales han Provincial Task Force to End Local Communist Armed Conflict (NTF-ELCAC). Ini nga hugpo in nakigistorya ngan naghangyo ha mga pamilya han mga rebelde nga kumbinsiron hira nga bumalik na ha panig han gobyerno.
An mga nagsurender in ginpangunahan ni Dino Bachicha alyas Linoy, anay lider han Sentro de Grabidad, Bugsok Platoon han NPA ha rehiyon otso.
An mga armas nga igintubyan han mga rebelde in napulo nga M16 rifles, duha nga kalibre 45 ngan usa nga glock 17 pistol. Iginsumat gihapon han mga rebelde kun hain namumutang an igindederi nga landmines, gamit medikal ngan iba pa nga mga ekipahis han kagiusan kumunista.
Kasumpay hini, hi Col Lenart Lelina, 801st Brigade Commander, in nagpahayag nga an pagtikaluya ngan pagkabuhagbuhag han mga lideres han CPP-NPA-NDF ha Eastern Visayas in klaro nga senyales nga mabinungahon an mga pitad han gobyerno ngan iba pa nga sektor para han kamurayawan. Sering pa ni Lelina, nakakasantop na an kadam-an nga rebelde nga sinsero an gobyerno han pagbulig ha ira.
