Isumat.com/Enero 18, 2023
Duha o tulo ka bulan tikang yana, masasabtan na kun may kapas ba an syudad han Tacloban nga magkamay-ada hin kalugaringon nga plantasyon o haluag nga umhanan hin sibuyas.
Ini an iginsumat ni City Agriculturist Romelo Anade dida han interview ha iya han iFM-RMN Tacloban kakulop, Enero 17, 2022.
Sumala kan Anade, hapagkayana nagdudumara na hira hin trial period o pagtesting kun malangbo ba an sibuyas denhi ha Tacloban. Masasabtan kun maturok ngan magigin produktibo an ira igintanom nga sibuyas ha sulod hin duha tobtob tulo ka bulan.
Hinsabutan nga tulo nga variety hin sibuyas an igintanom han City Agriculturist Office para hini nga trial period. Kun magin mabinungahon ini, magkakamay-ada hin demo farm an syudad para han sibuyas ha Norte nga dapit.
Partikular nga gintutudlok ni Anade an New Kawayan, Sta Elena, San Roque, Camansihay, Brgy 12 ngan Brgy 103 nga puede mahimo-an hin demo farm.
Ginseguro gihapon han opisyal nga dida han trial period , ira gingamit an mga moderno nga teknolohiya nga makakasurapo han epekto han climate change.
An gulpi nga kahitaas han presyo amo an panguna nga nagduso han ahensya nga magmugna hini nga pitad.
Usa han posible nga maka-apekto han paglangbo han sibuyas amo an klase han panahon denhi ha Tacloban, sering ni Anade. Iya igin-esplikar nga an sibuyas in nagkikinahanglan hin sustenado nga sirak han adlaw ngan deri nagpapanunubra nga tubig, sanglit kinahanglan an kaangayan nga irigasyon.#
