Isumat.com/Enero 19, 2023
Pangabugho an gintutudlok nga motibo han pagpataya hin usa nga parag-uma ha Gamay, N. Samar kakulop, Enero 18, 2023.
Ha spot report han PNP, ginkilala an biktima nga hi Rolando Agosto, 55 anyos, inasaw-an ngan residente han Brgy Bato han mao nga bungto. Ginkilala naman an suspetsado nga hi Jonathan Dolim, 34 anyos, inasaw-an, ngan nag-uukoy gihapon han nasabi nga lugar.
Igin-alegar nga pasado alas 5 han kulop, hi Agosto in nag-antos hin mga kasamdan ha lawas tungod han pagbunubono-a ha iya han suspetsado gamit in sundang ha sulod mismo han balay han biktima. Gindara ha Gamay District Hospital an biktima pero igindeklarar nga dead on arrival.
Kadagmitan umiskapo hi Dolim pero an sundang in nakuha han kapulisan kay iginbilin ini ha balay han bugto han gintatahapan.
Ha imbestigasyon han kapulisan, selos an posible kawsa han panhitabo kay may mga sumat-sumat nga an misis han suspetsado in may relasyon ngadto han biktima.
Samtang, didto naman ha Ormoc City, namatay kay nakuryente hi Felix Parilla, 32 anyos, waray asawa ngan temporaryo naukoy ha Brgy San Pablo han nasabi nga syudad.
Natabo an insidente alas 10 han aga, Enero 18, 2023. Nagpapakita an imbestigasyon nga hi Parilla in nagtatanggal la han dekorasyon nga Christmas lights ha atop han Carlosta Hotel ha Brgy Cogon han aksidente nga makasagi hiya hin live wire hinungdan han iya kamatay.
Ha iba nga notisya, na-aresto in usa nga High Value Target ha ginbuhay nga anti-illegal operation pasado alas 1 han kulop, Enero 18, 2023 ha Brgy 106, Sto Nino , Tacloban City.
Ginkilala an suspetsado nga hi Romeo Boco Jr, 31 anyos, ngan residente han mao nga lugar.
Nakumpiskar tikang han suspetsado in unom ka sachet hin gin-aalegar nga shabu kantidad hin 34 mil pesos, upod na gihapon an buy-bust money.
An mao nga operasyon in ginsaksihan han opisyal han barangay ngan tinaglawas han media. An suspetsado in maatubang han kaangayan nga mga kaso may paghisumpay han balaud kontra han iligal nga droga. #
