Hi Karl Chan (standing-left most) upod an mga opisyales han PNVF katapos han ira eleksyon. (Photo via mb.com.ph)

Isumat.com/Enero 19, 2023

Hi Karl Chan han Tacloban City in magpapadayon pagkapot hin importante nga posisyon ha Philippine National Volleyball Federation (PNVF) komo miembro han board han nasabi nga National Sports Association.

Dida han gindumara nga eleksyon han mga opisyales han federasyon hadin nag-agi nga adlaw, hi Chan in nagkamay-ada hin bag-o nga termino ha iya pwesto ngan magseserbe na liwat hiya hin duha ka tuig ha mao nga katungdanan. Hadton 2019, hiya in napili gihapon ha mao nga pwesto.

Samtang, na-eleher utro hi Ramon Suzara komo PNVF President. Napili naman nga Chairman an taga Isabela City nga hi Arnel Hajan. Hi Leyte 4th District Congressman Richard Gomez in natudlok nga Deputy Secretary-General for International Events.

Hadto nga panahon, ini nga asosasyon in gintawag nga Philippine Volleyball Federation (PVF) pero tungod hin pira nga mga isyu, ginliwanan ini han PNVF.

Hi Chan in nagin Secretary-General hadto han PVF ngan nagin Officer-in-Charge han asosasyon. Hiya gihapon an nag-establisar han Volleyball Association of Leyte-Tacloban City. An iya lokal nga grupo amo an nagpapadayon pagpa-angbit han kina-adman han volleyball ha mga intresado nga players denhi ha Tacloban ngan magkalainlain nga parte han Rehiyon Otso.

Kadam-an nga produkto han Volleyball Association of Leyte-Tacloban City in nagin miembro hin varsity teams han mga unibersidad ha Manila nga nakikiglantugi ha UAAP ngan NCAA. Ini nga iya local volleyball program in nagin dalan para han mga student-athletes hin damo nga oportunidad nga nakabulig ha edukasyon ngan pag-uswag han kinabuhi.

An iba nga nagmulay ha iya volleyball program ha Tacloban in mga players na yana han Philippine Volleyball League.

Hi Chan in nagtotoo nga an pagdukwag han volleyball ha Pilipinas in magtitikang gud ha grassroots level. Tungod hini, padayon nga iya iginduduso an pagpartisipar han mga atleta ha mga bungto ngan probinsya tipakadto han hiruhitaas nga pantag hin kompetisyon.

An Volleyball Association of Leyte-Tacloban City in nag-eensayo ha CEO Gym, Tacloban City ngan puede makigsumpuyan ha ira an intresado nga mga batan-on ha volleyball. #