Isumat.com/Pebrero 7, 2023

Tungod han reklamo nga estafa, gin-aresto han kapulisan an suspetsadp ginkilala nga hi Russel Peraleza, 34 anyos, ngan residente han Purok 1, San Sebastian Samar.

Subay han report, pasado alas 12 han udto, Pebrero 6, 2023, hi Peraleja in dumaop han tagreklamo nga hi Mariela Altares, 30 anyos nga taga Palanog, Tacloban City. An gintatahapan in nagsering nga magpapadara hiya hin 15 Mil pesos pinaagi han Gcash.

An re-loader nga biktima in sumugot ngan gin-send ngadto han celphone number nga iginsumat han suspetsado. Pero han nasukot na an biktima, waray bumayad hi Peraleja ngan nagrason nga waray niya kwarta. Kadagmitan nagreklamo ha pulis hi Altares ngan nadakop dayon an suspetsado.

Didto naman ha Kananga, Leyte, gintotoohan nga problema ha gugma an hinungdan han pagkamatay han biktima ginkilala nga hi Mercolito Boloy, 26 anyos, waray asawa, ngan residente han Brgy Rizal han mao nga bungto.

Ha report han PNP, natabo an paghikog han biktima alas 5 han maagahon, Pebrero 6, 2023 pinaagi han paghigot han iya liog ngadto han puno hin gemelina luyo han ira balay.

An bugto han biktima an nakadiskubre han natabo hadto nga maagahon ngan gintalinguha pa nga madara ha hospital an biktima pero igindeklarar nga dead on arrival. Nagawas ha imbestigasyon nga antis pa hini, duha na ka beses nga nagpruweba pagpakamatay hi Boloy. Nagsering an mga paryente han biktima nga nag-aantos hi Boloy hin depresyon dara han problema ha iya oyab.

Samtang, usa naman nga High Value Individual Drug Watchlist target an na-aresto ha buy-bust operation alas 7 han gab-i, ha Brgy Tagnipa, Maasin City, Southern Leyte, Pebrero 6, 2023.

Ginkilala an suspetsado nga hi Silbo Tombiga, 46 anyos, waray trabaho, ngan residente han Brgy Suangon, St. Bernard, Southern Leyte. Nakuha tikang ha iya in 26 ka sachet hin gintotohan nga shabu balor hin 3.4 milyones pesos, kalibre 45 nga pistola, 22 nga bala, usa nga pisaw, cellphone nga Huawei, ngan personal nga mga gamit, upod na gihapon an buy-bust money.

Ha koordinasyon han PDEA-Region 8, gindumara an operasyon han mga personales han Southern Leyte PNP Drug Enforcement UNit, Macrohon PNP, Maasin City PNP ngan 1st ug 2nd Southern Leyte PNP Mobile Force Company. #