Isumat.com/Pebrero 7, 2023

Tungod han paningkamot han iya mister, mga opisyales han barangay ngan mga otoridad, bumalik ha piyod han balaud in usa nga anay kaapi han rebelde nga New Peoples Army ha Sitio Lourdes, Brgy Manunca, Sta Rita, Samar hadton Pebrero 5, 2023.

Ginkilala an nasabi nga nagsurender nga hi alyas Ka Lea, 33 anyos, inasaw-an, ngan anay kaapi han SYP Platoon Botchoy ha ilarum han Jorge Bolito Command han mga rebelde ha Eastern Visayas. Dida han iya pagsurender, gin-amin ni Ka Lea nga nagin aktibo hiya nga miembro han NPA tikang han 2010 tobtob 2016 ngan nagpakasal hiya samtang aktibo pa ha kagi-usan.

An mga otoridad an nagpasilitar han iya pagsurender pinaagi han tim-os nga paghangyo han mga barangay officials ug han iya mister. An mga elemento han Sta Rita PNP, PNP Regional Intelligence Unit, PNP Samar Provincial Office ngan Philippine Army 63rd Infantry Battalion an nagsumpayan para hini nga pagsurender.

Samtang, usa liwat nga lalaki nga rebelde an sumurender ha Brgy Buenavista, Quinapondan, E. Samar, Pebrero 6, 2023.

Hiya in ginkilala nga hi alyas Ka Blucel, 39, anyos, waray asawa ngan residente han mao nga bungto. Iya gihapon igintubyan ha mga otoridad an usa nga Norinco 9 mm pistol, siyam nga mga bala, ngan duha nga rifle grenades.

Hi Blucel in kaapi han Squad 1 ni Ka Bambi ha ilarum han Apoy Platoon, Sub-Regional Committee Sesama han NPA nga nagi-os ha mga kabubkiran tikang ha Lawaan ngadto ha Borongan City, Eastern Samar.

Ginpasilitar an iya pagsurender han 2nd E. Samar Mobile Force Company han PNP.

An duha nga mga nagsurender in aada ha kustudiya han mga tinubyanan han balaud para han kaangayan nga disposisyon ug an pagproseso han ira pakatagamtam han mga benefecio tikang ha gobyerno. #