Isumat.com/Pebrero 8, 2023
Tobtob la ha pagbantay palibot han barko ngan pagduhol hin ayuda an puede pagbuhaton han Philippine Coast Guard (PCG) ngadto han Chinese “fishing vessel” nga naka-angkla harani han Tacloban Port ug ha mga tripulante hini.
Hi Coast Guard Eastern Leyte Station Commander Ramil Montemar in nagpahayag nga an mga tripulante in deri na nasugot nga makasakay ha barko an mga personales han PCG. Dida han Lunes, Pebrero 6, 2023, an PCG personnel in pumakadto han barko nga F/B Kai Da 899 basi panginanoon an kahimtang han mga Tsino, pero waray hira pasakya ngadto han barko.
An ginhimo nala han PCG amo an pagduhol han ira dara nga pagkaon ngan tubig nga ginkarawat naman han mga tripulante.
Nagsering hi Montemar nga hadto nga adlaw, gintawagan hira han abogado han mga tripulante ug nagsering nga sasampaan hira hin kaso kun mag-insister pagsulod ngadto han sarakyan.
Hapagkayana, an ginhihimo han PCG amo an mahugot nga pagbantay palibot han barko basi maseguro nga waray maraot nga matatabo ngadto han mga Tsino. Nagbutang gihapon hira hin spill boom palibot han sarakyan basi kabalabgan an pagsarang han krudo pananglitan magkaada hin fuel leak.
An barko in napulo na ka adlaw ha San Pedro Bay katapos la nga pagkurnahon ini han PCG tikang ha Suluan Island, Guiuan, Eastern Samar han mangaro hira hin bulig kay nagkaada hin problema an timon han sarakyan.
Tobtob yana, waray nahipapakita an mga tripulante ug an nag-aalegar nga tag-iya han barko nga Certificate of Ownership ngan Certificate of Registration. Lugod an nahipresentar amo an Certificate of Deletion nga igin-isyu han gobyerna han China. Ini nga sertifico in nagsusumat nga nag-expire na an rehistrasyon han barko ngan waray katugutan nga gamiton ini ha pagbiyahe, sumala han Coast Guard.
Nagdidig-on gihapon an mga tripulante nga mangirisda hira pero waray nahipakita nga seaman’s book. Mahugot gihapon an ira pag-insister nga fishing vessel an sarakyan bisan kun waray nakit-an nga gamit hin pangisda an mga otoridad didto han barko.
An PCG in hingpit an panindugan nga deri puede magdara hin mga pyesa para han pag-ayad han barko, labi na nga deri ini puede palakton kun deri makumpleto pagpresentar han mga dokumento basi klaro kun hin-o gud an tag-iya han mao nga sarakyan. #
