Isumat.com/Pebrero 10, 2023
Waray kaupayan ngan kalipayan an Valentines Day para hini nga mag-asawa kay ginpatay ni mister an gin-aalegar nga “oyab” han iya misis ha La Paz, Leyte.
Ha report han PNP, ginkilala an namatay nga biktima hin panmuno nga hi Nilo Suyom, 32 anyos, waray asawa, ngan nag-uukoy ha Poblacion District II, La Paz, Leyte. An suspetsado in ginkilala naman nga hi Agusto Pedrigal, 42 anyos, inasaw-an ngan residente han Brgy Lubilubi han nasabi nga bungto.
Ha inisyal nga imbestigasyon, nagawas nga pangabugho ngan ka-aktuhi ni Pedrigal nga mayda natatabo nga deri maupay ha butnga han iya misis ug han biktima.
Natabo an insidente pasado alas 11 han gab-i, Pebrero 8, 2023 ha panimalay han suspetsado ug han iya asawa ha Brgy Lubilubi.
Sumala han mga imbestigador, hi Pedrigal in nagtatahap na nga mayda “relasyon” an iya asawa ug hi Soyum. Ngan hadto nga takna, umuli ha ira balay an suspetsado ngan iya gud na-aktuhan nga naghaharukay an iya asawa ug an biktima.
Dara han iya pagtahap ngan aktuwal nga nakit-an, waray na makapugong han iya emosyon an suspetsado ngan ginbuno-buno an biktima. Nadara pa ha Rural Health Unit hi Soyum pero paghagos hin pira ka oras, binawi-an hin kinabuhi.
An mga opisyal han barangay amo an nagtubyan kan Pedrigal ngadto han kapulisan para han kaangayan nga disposisyon. #
