Isumat.com/Pebrero 11, 2023
Bisan kun waray nira ma-angkon an ginhihingyap nga kampeonato ha Visayas Regional Finals, nagin malinangpuson an tinguha han mga baseball ngan softball players han Northern Samar ngan Tacloban City nga maka-api han Little League Philippine Series National Finals.
Ini in katapos la nga makakuha han ikaduha nga pwesto an upat nga baseball teams han Northern Samar ug an usa nga grupo han mga Taclobanon dida han ira tagsatagsa nga dibisyon han Visayas Regional Finals ha Kamagsangkay Cultural and Sports Complex, Pambujan , N. Samar nga gindumara Pebrero 5-11, 2023.
An mga teams tikang han baseball powerhouse Negros, Bago City, Lapulapu City ngan Northern Cebu an naghadihadi dida han mao nga torneo ha Pambujan.
An Lapulapu City an nagin kampeon ha Little League ngan Junior League Baseball. An Northern Samar amo an 2nd placer hini nga duha nga kategorya.
An North Cebu an naka-angkon han titulo ha Intermediate Division ngan Senior League Baseball, samtang Northern Samar an 2nd placer han mao nga mga dibisyon.
Ha larangan han softball, Negros Occidental an kampeon ha Little League ngan Tacloban City an ikaduha nga pwesto.
Ha Junior League softball, nadag-an an korona han Bago City ngan ikaduha an Negros Occidental.
Ha Senior League softball, kampeon an Negros Occidental ngan 2nd placer an Bago City.
An kampeon ngan 2nd placer ha kada kategorya an nag-qualify para han National Finals nga bubuhaton ha Ilagan City, Isabela hiton Abril yana nga tuig.
Ginpamatud-an han mga softball teams han Negros Occidental ngan Bago City nga mga poderoso hira nga hugpo ngan world-class players. An pira han ira players in nakag-oyag na ha Softball World Series ha Amerika han una nga tuig ngan naka-angkon pa hira hin 3rd ngan 4th place han nasabi nga kompetisyon.
An iba pa nga lugar nga nagpadara hin teams han torneo ha Pambujan amo an Maasin City, Calbayog City ngan Jimalalud City, Negros Oriental.
Am LGU-Pambujan ha pamuno ni Mayor Eping Sosing in naningkamot nga ha ira bungto himoon an Visayas Regionals basi mahipahinumdon ngan umuswag utro an pagigin bang-giitan han mga Pambujanon ha baseball.
Dako gihapon an bulig han Northern samar Provincial Government ngan Department of Education han nasabi nga pa-isan-isan.
Hadton Dekada 70 ngan Dekade 80, an Team Nalucaban han Pambujan in lima ka beses nga nagin kampeon han National Baseball Open Championships, ngan nakadaog hin kadam-an nga titulo ha EVRAA ngan Palarong Pambansa.
Hira gihapon an nagtaglawas han Pilipinas para han mga international competitiions sugad han Far East Championship ha Taiwan han 1975, Far East Championship ha Guam han 1976, West Coast Regional Championship ha California ngan iba pa nga torneo ha gawas han Pilipinas.
Hapagkayana, kadam-an nga taga Pambujan in kaapi han varsity baseball teams hin mga unibersidad ha Manila nga kaapi han UAAP Tournament.
Ginhihingita han mga taga Pambujan nga magtikakusog utro an ira baseball ngan softball teams ngan ini in magdadalan han kabug-usan nga pag-ursa han nasabi nga oyag ha bug-os nga Eastern Visayas.
An nagdudumara yana han training han Pambujan team amo an Pambujanon nga nakagmulay ha Minor League Baseball ha Amerika nga hi Mon Espina, kasugbong an iba pa nga mga coaches. #
