Isumat.com/Pebrero 2, 2023
Aminado an mga hospital denhi ha aton dapit nga dako gud an kulang han suplay han dugo nga nakahipos ha mga hospital para han mga pasyente nga nagkikinahanglan.
Dida han Media Forum ha Hotel de Fides, Tacloban City, Pebrero 1, 2023, iginsumat ni Atty Rodolfo Penalosa, tagpamulong han Eastern Visayas Medical Center (EVMC) nga an Blood Bank han nasabi nga hospital in may kapas paghipos hin damo nga dugo.
An problema, sumala kan Penalosa kay deri damo an nagdodonar hin dugo. Waray man liwat otoridad an gobyerno nga magpirit ha katawhan nga magdonar hin dugo, sering pa han opisyal, ug waray man liwat pagkukuhaan hin dugo kundi tikang mismo han mga indibiduwal nga magboboluntaryo paghatag hini.
Kasumpay hini, hi Penalosa in nag-aaghat ha magkalainlain nga sektor ngan mga grupo nga makigsumpayan ha EVMC para han blood donation activities. Sering pa niya, nagtitikadamo an popolasyon sanglit natural la nga magtitikadamo an pasyente, pero kulang liwat an nagddonar hin dugo.
Nag-esplikar naman hi Penalosa nga kun hira la an masusunod, waray unta bayad an screening han dugo nga gagamiton para han mga pasyente. Ugaring la kay ini nga proseso in deri upod han pondo nga igin-alutaga han gobyerno nasyunal para han Department of Health.
Ha panig naman han Gov Benjamin Romualdez General Hospital and Schistosomiasis Center ha Palo, Leyte, iginpahayag ni Chief of Hospital Dr Lyn Verona nga maniningkamot hira nga magkaada han ira kalugaringon nga blood storage facility.
Hapagkayana, an mga pasyente han hospital in nag-aantos pa an ira mga nagbabantay nga pumakadto ha EVMC ngan Red Cross ha Tacloban basi manginano kun may abilable nga dugo ngan duro ini hin kahirayo.
Hinungdan hini, tatalinguhaon han Schisto hospital ha Palo nga dida na mismo ha ira an paghipos han igdodonar nga dugo.
Nagtriple na gihapon an kadamo han mga pasyente dida hini nga hospital katapos la han upgrading hini tikang ha Schisto Center nga magin general hospital. #
