Isumat.com/Enero 28, 2022
Posible mayda aatubangon nga kaso in usa nga Kapitan hin barangay katapos han iya pagpatambal ha hospital tungod ha alegasyon nga paggamit niya hin dinamita ha pangisda nga nagin hinungdan han iya kasamad ngan duha pa niya nga kaupdanan ha Zumarraga, Samar.
Gintatambal yana ha hospital an mga nagkabubuthan han dinamita nga hira Elino Sobrino, 58 anyos nga amo an Chairman han Brgy Maputo han mao nga bungto; Fernan Hinundayan ngan usa nga menor de edad.
Subay han imbestigasyon, an grupo nira kapitan in nananagat ha Brgy Tinaogan hadton Enero 26, 2022. Han iglalabay na unta ni Sobrino an dinamita ha dagat, bumuto ini samtang iya pa ginkakaptan rason nga nag-antos hira hin mga kasamdan ha magkalainlain nga parte han ira lawas.
Ginbuligan hira han mga residente didto han lugar ngan gindara ha Samar Provincial Hospital ha Catbalogan City. Hinsabutan nga hi Sobrino in iginbalhin ha Eastern Visayas Medical Center ha Tacloban City.
Hi PNP Regional Director Brig Gen Rommel Cabagnot in nagpabati hin kabido hini nga insidente tungod kay usa pa gud nga opisyal han gobyerno an nadadabi hini nga iligal ngan peligroso nga pamaagi hin pangisda.
Sering pa ni Cabagnot, hingpit na an paniguro han mga otoridad pagsurapo hini nga aktibidad, pero mayda la gihapon nagpapasipara pagbuhat hini. #
