Isumat.com/Enero 27, 2022

Nag-antos hin mga igo hin shrapnel in usa nga sundalo ngan usa nga kaapi han CAFGU han pabuthon han mga terorista nga NPA an ira igintanom nga bomba ha Pinabacdao, Samar hadin Enero 25, 2022.

An mga biktima in ginkilala nga hira Army Sgt Alan Albuera ngan CAFGU member Rolando Abainza Jr. Hira in nakadestino ha 46th Infantry Battalion han Philippine Army.

Aada na hira yana ha talwas nga kahimtang ngan nagpapa-upay didto hin usa nga hospital.

Natabo an insidente pasado alas 8 han aga ha Brgy Pelaon, Pinabacdao. An mga tropa han gobyerno in tikadto han ira bag-o nga kampo han nasabi nga lugar han pabuthon han mga rebelde an bomba.

Sumala han report han Philippine Army, gintukod an nasabi nga detachment tungod han ungara han mga baryuhanon nga magkaada didto hin presensya han militar basi maproteheran hira kontra han mga rebelde.

Ini nga patraydor nga insidente in mahugot nga ginkondenar han lokal nga pamunuan han Pinabacdao ngan 8th Infantry Division.

Subay han report, hi Mayor Teodorico Mabag in nagpahayag nga ini in klaro nga pagbaliwaray han NPA han kinabuhi han katawhan kay bisan hin-o in puede madisgrasya tungod han igintanom nga bomba.

Igindig-on naman ni BrigGen Edgardo de Leon, Commander han 8ID, nga waray gud pag-alang an NPA nga buhaton ini bisan kun nagdudurot ini hin peligro ha mga sibilyan.

Sering pa ni De Leon, padayon an NPA hin paghipos, paghimo ngan paggamit hini nga mga landmine, ug ini in klaro nga pakatalapas han ginkasarabutan dida han UN Geneva Convention kun diin igindederi an paggamit han mga landmines kay delikado ini para han kinabuhi han ngatanan.

An National Democratic Front-NPA in angay la magbaton hini nga ira kasaypanan kontra han katilingban, pahayag pa han heneral.

Dida han 2021, an mga tropa han gobyerno in nakadiskubre ngan nakakumpiskar hin haros usa ka gatos nga mga “anti-eprsonnel landmines” ha magkalainlain nga lugar ha Eastern Visayas. #