(file photo by dumaguete.com)

Isumat.com/Enero 28, 2022

Nakapatik ha balaud nga an PhylSis ID o National ID in usa nga valid ID nga kinahanglan karawaton ngan kilal-on nga tinood nga Identification Card ha ngatanan nga transaksyon ha gobyerno ngan pribado nga sektor.

Ini an igindig-on ni Wilma Perante, nangungulo han Philippine Statistics Authority (PSA) ha Eastern Visayas dida han interview han iFM-RMN Radio Tacloban, Enero 27, 2022 ha atubangan han mga reklamo hin damo nga katawhan nga deri ginkakarawat an ira National ID ha mga remittance center ngan pira nga bangko komo valid ID.

Nagsering hi Perante, an Republika Akta 11055 o Philippine Identification System Act in nagmamando ha ngatanan nga establisemento nga kilal-on nga valid ID an PhylSis ID. Panguna hini nga panuyo nga deri na magdaradara pa hin damo nga dokumento o ID Cards an publiko ngan ini nala nga PhylSis ID kay makakasapar na ini ha pagkilala han tawo nga nagkakapot hini.

Ginklaro han opisyal nga waray pirma o signature nga makikit-an dida han PhylSis ID kay ini in “digitized.” Ini nga “digitization” ngan deri pagkita-a han pirma in iginmamando gihapon han balaud kay lakip ini han “security features” han National ID, sering pa ni Perante.

Iginbuyagyag pa niya nga ira na gintagan hin mga patakaran o guidelines an mga establisemento kun pa-unan-o masasabtan kun tinood o peke an iginpapakita nga National ID han ira mga kliyente.

Ginpanawagan gihapon ni Perante an mga establisemento nga makigsumpayan ha PSA basi matagan hira hin giya o abiso han estratehiya pagtudlok haa tinood o peke nga National ID.

Kadungan hini, hi Perante in nag-aaghat ha hin-o man nga makaka-eksperensya hin sugad hini ha mga transaksyon nga deri mag-alang pakigsumpayan ha PSA basi tawagan nira dayon an ahensya nga deri nakarawat han National ID.

Kinahanglan la nga ngaranan han tagreklamo an kompaniya, address ngan kun kakan-o nahitabo.

Iginhatag han PSA Regional Office an paagi basi hira ma-contact han karuyag mag-reklamo: Email ad: psa_reg8@yahoo.com : ngan puede liwat ha facebook – Philippine Statistics Authority – Eastern Visayas. #