Isumat.com/9:16AM, November 9, 2020
“Kinahanglan waray na kinabuhi nga masasakripisyo ha maabot nga mga kalamidad.”
Ini an gidadaku-i nga leksyon nga angay mahinumdoman pirmi han mga Taclobanon nga durot han Super-Typhoon Yolanda pito na ka tuig an nakalabay, pahayag ni City Mayor Alfred Romauldez dida han programa nga Straight to the Point han iFM-RMN Tacloban.
Ha pagtigaman han anibersaryo han makangingirhat nga bagyo, igindig-on ni Romualdez nga deri hiya matugot nga mayda pa magkakamagtay tungod hin pagpasibaya ngan pagtagya kun mayda mga kataragman. Labot la hini, karuyag gihapon han alkalde nga unta waray na kabablayan ngan mga propyedad nga magkakaguguba.
Hinungdan hini, nagpapadayon an pagpabalhin han City Government han katawhan ngadto han talwas nga mga lugar. Sering pa ni Romualdez nga deri na kita magpabasol-basol, lugod pirmi magsunod han mga abiso han otoridad labi na kun may kalamidad nga ti-arabot.
Nabibido an alkalde nga may pira nga barangay kapitan nga nasugot la nga mag-ukoy an mga residente ha delikado nga mga lugar tungod na gihapon han botos hini nga mga mulopyo kun mayda eleksyon.
“Maaro ako hin bulig ha PNP ngan AFP basi han pagpwersa hin evacuation kun mayda magtig-a an ulo nga deri masugot hin pagbalhin kun may kalamidad,” pahayag pa ni Romualdez.
Nagpahayag pa hiya nga kinahanglan an hingpit nga pag-ikmat han mga Taclobanon kay duro ka peligroso an lokasyon han syudad tungod kay waray lulusutan an tubig tikang ha kadagatan kun mayda storm surge. An Tacloban in deri parehas han iba nga lugar nga damo an lurusutan han baha. An syudad in baga-baga hin imbudo, sering pa han alkalde.
