Isumat.com/7:17AM, November 10, 2020

Katapos hin halaba nga panahon nga paka-ikyas, maatubang na han kaso nga unom ka ihap hin pagpatay an numero uno nga wanted ha probinsya han Leyte.

An akusado han 6 Counts of Murder nga hi Leopoldo Glema, residente han Brgy Nauguisan, Carigara, Leyte, in nadakop hadin nag-agi nga adlaw ha Brgy East Rembo, Makati City. Am mga operatiba han Leyte PNP, Carigara PNP ngan Makati PNP Intelligence Unit an nag-aresto kan Glema pinaagi han warrant of arrest nga iginpalusad han RTC Branch 13, Carigara, Leyte.

An akusado nga may alyas nga “Bata Yupol” in temporaryo iginpaslak ha Makati City Lock-up Facility, samtang gin-aareglar an mga dokumento basi hiya igbiyahe ngadto ha Carigara ha pagbista han kaso kontra ha iya.

Ha iba naman nga police report, nasikop han mga otoridad an usa nga menor de edad nga gintatahapan nagkawat hin motorsiklo.

An biktima nga hi Erwin Radam han Abucay, Tacloban City, in nag reklamo ha kapulisan nga ginkawat an iya motorsiklo.

Kadagmitan naghimo hin operasyon an kapulisan ngan naaktuhan nira nga ginmamaneho-an pa han suspetsado an motorsiklo ha Brgy 101, New Kawayan, Tacloban. Nagpruweba pa an suspetsado hin pagkalagiw pero nakorner hiya han mga tinubyanan han balaud.

An menor de edad nga suspetsado in gindara ha Abucay Police Station para han kaangayan nga disposisyon.

Han nag-agi nga pira ka bulan, nagtikahitaas an numero han insidente hin pangawat hin motor ha Tacloban ngan pira nga parte han rehiyon. Bisan ngani an mga otoridad han balaud in nagkabibiktima na gihapon. #