Isumat.com/7:46AM, November 9, 2020
Ha atubangan han padayon nga pagsaka han ihap han mga nagkakatatapnan han Covid-19 ha Eastern Visayas, nagtitikahitaas naman an kadamo han nagpapakatalwas tikang han kagaw.
Dida han report han DOH-Regional Office kakulop, Nobyembre 8, an mga naka-recover nga pasyente in aada na ha 6,663. Ini in 91 porsyento han 7.317 nga Total Cases han rehiyon tobtob han nasabi nga petsa. Mayda naman yana 583 nga Active Cases.
Ha luyo nga bahin, duha nga pasyente an naawat an kinabuhi hadin nag-agi nga adlaw. Amo ini an 61-anyos nga babaye nga taga Giporlos ngan 60-anyos nga lalaki nga taga Guiuan, Eastern Samar. Hinungdan hini, umabot na ha 71 an Covid-Related Deaths ha Sinirangan Bisayas.
An Isumat.com in nakahikay gihapon hin impormasyon nga hadton Biernes may nagpositibo nga mga preso ha Provincial Jail ha Hilongos, Leyte. Tobtob yana, waray pa katutudlok kun hin-o o paunan-o natapnan an mga preso.
Ha Ormoc City, mayda na liwat empleyado han Ormoc District Hospital nga natapnan han virus. Hiya an nahidugang han bag-o nga na-alakbatan han kagaw didto han hospital. An ODH in naka-lockdown na liwat yana han magpositibo ngan makatapon ha iba an usa nga nurse hadton nag-agi nga semana. Ini an ikaduha ka beses nga temporaryo ginpa-ukoy an operasyon han hospital.
Hinayhinay naman an paghugpoy han mga kaso ha Maasin City, Southern Leyte. Hadin Oktubre, tigda naghitaas an numero han natapnan didto han syudad. Nag lockdown an City Police Station ngan pira nga barangay han Maasin. Subay han gibabag-uhi nga impormasyon, tulo nala an Active Cases didto han lugar. Dida han 179 nga natapnan nga Maasinhon, 176 na an nakatalwas.
Ha Tacloban City, haros usa na ka yukot an natapnan han virus, pero damo liwat an naka-recover na. Dida han 972 nga nagpositibo, naka-recover na an 885. Hapagkayana, sobra 70 an aktibo nga mga kaso han syudad. #
