Isumat.com/9:16AM, August 30, 2020
Dida han sobra 200 nga mga bag-o nga kaso han Covid-19 ha Eastern Visayas kakulop, Agosto 29, siyam ha ira in mga residente han Northern Samar. Lima an taga Catarman, tulo an taga Victoria ngan usa an nag-uukoy ha San Isidro.
Subay han pahayag han Provincial Information Office, umabot na ha 90 an nagkatatapnan ha ira probinsya upod na ini nga siyam ngan dida han bag-o nga nagkatatapnan, makokonsiderar nga pira ha ira o bangin tanan hini nga siyam in posible natapnan hin kilalado ngan ma-impluwensya nga personalidad o tinatawag nga VIP (Very Important Person).
Dida han report han Information Office, lakip han nagkatatapnan in usa nga 62-anyos nga lalaki. Hiya in VIP Security ngan close contact hin kumpirmado nga kaso. Natapnan gihapon an 36-anyos nga babaye nga kabulig ha panimalay kumpirmado nga kaso. Mayda gihapon lalaki nga drayber hin kumpirmado nga natapnan. Ika-upat an 43-anyos nga pulis nga close contact gihapon, ngan ika-lima an lalaki nga photographer ug close contact liwat han kumpirmado nga kaso. Ini an lima nga taga Catarman, ug an tulo ha ira in nagpapakita hin sintomas sugad han ubo, sip-on ngan hiranat.
An tulo nga taga Victoria in close contact gihapon hin kumpirmado nga kaso. Hira in nagtambong hin katitirok para han Senior Citizens hadton Agosto 13. Samtang an taga-Bobon in 55-anyos nga Security Personnel.
Nagsering pa an report nga ini nga siyam in ngatanan apiki nga iginka-urusa hin parehas nga kumpirmado nga kaso, bootsidngon paprehas hira close contact hin usa la nga tawo.
Hi Northern Samar 1st District Congressman Paul Daza in nag-angkon nga positibo hiya han Covid-19. Tikang ha Manila, hiya in pumakadto han iya distrito ha Norte hadton Agosto 8 ngan naglibot-libot han mga lugar nga iya nasasakupan ug nag-atender hin pira nga katitirok.
Pero hi Daza in nagsering nga antis hiya umuli ha Norte, nagpa swab test anay hiya ha Manila ngan negatibo an resulta. Paghagos hin sobra usa ka semana tikang han iya pag-uli ngadto ha Norte, naka-abat na hiya hin deri maupay ha iya panlawas ngan nag-kwarentina hiya ha ira balay.
Pira ka adlaw an nakalabay, bumalik hiya ha Manila komo pagsunod han sagdon han mga doktor basi masabtan kun ano an problema ha iya panlawas. Utro hiya gin-swab test ngan nagin positibo an resulta. Naka-admit ha usa nga hospital ha Manila an kongresista hapagkayana.
Hadin Biernes, hi Northern Samar Governor Edwin Ongchuan in nag-request ha Regional Inter-Agency Task Force nga igbutang an iya lalawigan ha General Community Quarantine ha sulod hin usa ka bulan. Nagsering hi Ongchuan nga iya ginhimo ini nga aksyon tungod han Local Transmission ha iya probinsya ug an dako nga posibilidad nga maghitaas an mga kaso han Covid.
Posible ba nga natapnan han virus hi Daza katapos han iya syahan nga swab test ha Manila antis hiya umuli ha Norte, o didto na hiya katapni han iya distrito? Hiya ba an ginsesering nga VIP dida han report han Northern Samar Information Center?
Ini nga sitwasyon dida hini nga distrito in ginpa-grabe pa han nahitabo nga birthday party han Ex-Mayor han Allen kun diin sobra 500 katawo an iginreport nga nag-atender. Nagsering pa an impormasyon nga nag positibo han kagaw an Ex-Mayor.
An syahan nga distrito han probinsya in ginkokomponer han Allen, Bobon, Catarman, Lavezares, Lope de Vega, Mondragon, Rosario, San Isidro, San Jose, Victoria ug an mga isla nga mga bungto han Biri, Capul, San Antonio ngan San Vicente.#
