Isumat.com/7:24AM, August 30, 2020
Alagid-agid hin gin-agmakan hin delubyo an syudad han Tacloban tungod han bag-o nga 100 nga positibo han Covid-19 nga iginreport han DOH Regional Office kakulop, Agosto 29.
Ha kasaysayan han Covid ha Eastern Visayas, ini an gidadamu-i nga nahipatik nga nagpositibo ha usa nga lugar ug duroy ini nga nakakabaraka kay an Tacloban an ginkokonsiderar nga kapital han bug-os nga rehiyon kun diin naka-sentro an aktibidadis han ekonomiya, negosyo ngan pang gobyernuhan.
Hapagkayana, 419 na an natapnan han virus ngan sobra 300 an Active Cases. Dida han mga nagkatatapnan, sobra 30 an mga Health Workers nga residente han syudad.
Han nag-agi nga duha ka semana, haros kada adlaw an pagbunal han damo nga nagpopositibo ha Tacloban ug an kagab-i nga usa ka gatos an nakagdurot na hin kangirhat ha kadam-an.
Tungod hini nga panhitabo, haros ngatanan na nga Local Government Units han rehiyon an nagsagdon o nagmando ha ira mga mulopyo nga deri na pumakadto ha Tacloban kun deri gud importante hin duro an panuyu-anan.
An iba nga mga LGU in nagmando hin mandatory nga duha ka semana nga kwarentina ha bisan hin-o nga ira mulopyo nga mauli ha ira bungto tikang ha Tacloban.
Gintutudlok han mga opisyal han Tacloban City Government nga an dako nga rason han waray na hugpoy nga paglobo han mga nagkakatatapnan amo an nahitabo nga mga katitirok hin mga okasyon ug an nabatasanan nga pagkaka-urusa bisan waray okasyon.
Gintotoohan liwat nga kawsa han damo nga natapnan amo an paglikay han pira nga Taclobanon nga magpa-ilarum han kwarentina. Sumala kan City Disaster Office Chief Brando Bernadas, damo nga residente han syudad an iginka-urusa han mga miembro han pamilya nga mayda nagpositibo. An problema hini, sumala kan Bernadas, kay deri nagsusumat o iginsesekreto lugod hini nga mga indibiduwal nga nagin close contact hira han mga nagpositibo.
Nagpahayag pa an Disaster Official nga damo nga Health Workers ha mga pribado nga hospital kun diiin may nagpositibo nga mga pasyente an nagpapabilin nga na-uli ha ira tagsatagsa nga panimalay ngan nagdudurot ini hin posible nga pagsarang han virus ngadto han ira tagsatagsa nga pamilya.
Hi Mayor Alfred Romualdez in nagpapabilin nga madig-on ha iya panindugan nga deri hiya magpapatuman hin Lockdown han syudad kay magigin paralisado an ekonomiya han Tacloban ngan apektado gihapon hini an bug-os nga kapurupud-an.
An bug-os nga rehiyon otso in iginbalik ha General Community Quarantine tobtob hiton Setyembre 11. Igindederi gihapon an pagkabalik han mga Locally Stranded Individuals ha bug-os nga bulan han Setyembre.
Ha atubangan hini nga peligroso nga kahimtang han Tacloban, damo nga mulopyo an nagpabati hin kahulop nga bangin maparehas an syudad han natabo ha Cebu City nga nagin Hot Spot han virus. Duha na ka bulan an nakalabay, an syudad han Cebu an nag-antos han grabe nga epekto han Covid ug an gintutudlok gihapon nga rason amo an pagkatitirok ha mga okasyon ngan tagay-tagay.
Kadam-an nga Taclobanon an nagsuhestyon nga igbalik an Enhanced Community Quarantine, pero an paki-ana, maa-akos ba han lokal nga pang gobyernuhan an panhatag hin ayuda ngadto han mga mulopyo labi na gud an mga kablas nga nasarig la han kinada-adlaw nga kutsitsa. #
