Isumat.com/7:23AM, August 27, 2020
Nagtitikagrabe an epekto han Covid-19 ha Eastern Visayas dara han padayon nga paglobo han mga nagkakatapnan, namamatay ngan posibilidad nga pagkulang han hospital beds ngan mga Health Personnel nga nagtitimangno han mga pasyente.
Kakulop, Agosto 26, iginreport han DOH Regional Office an kadugangan nga 111 nga kaso han corona virus ha bug-os nga rehiyon. Tungod hini, umabot na ha 2,474 an nagkatatapnan kun diin 1,482 an naka-recover. Iginpasamwak gihapon han ahensya an 1,020 nga Active Cases hapagkayana.
Iginpahayag naman han LGU-Alangalang, Leyte nga mayda Covid Patient ha ira bungto nga tumalikod hin kadayunan kakulop. An namatay in lalaki nga 33-anyos nga taga Brgy San Vicente. Hiya in nagpapailarum hin dialysis ha pribado nga Dialysis Center. Komo pagsunod han Health Protocols, iginlubong dayon an patay nga lawas han pasyente. Sering pa han LGU, namatay ini nga pasyente antis pa gumawas an positibo nga resulta han iya swab test kagab-i. Ini nga kaso an ika-17 nga Covid Patient ha rehiyon nga binawi-an hin kinabuhi.
Dida naman han Press Conference kakulop nga gindumara han DOH, iginbuyagyag han ahensya nga namimintana yana an dako nga posibilidad nga magkukulang hin Bed Capacity an Eastern Visayas Regional Medical Center-Magsaysay Hub tungod han naghihinitaas nga ihap han pasyente. Bangin gihapon magkulang han mga Health Workers kay damo na an natapnan ngan aada hira ha kwarentina o Isolation. Pero iginpatapod han DOH nga maghihimo hira hin paagi basi masulosyunan ini.
An Samar Provincial Hospital ha Catbalogan in namemeligro gihapon nga umabot ha Danger Zone an Bed Capacity. Nagsering an DOH nga tungod ini han waray hunong nga pagdugang han mga nagkatatapnan han virus. Kakulop mayda 31 nga bag-o nga pasyente an Catbalogan City. Sobra na 300 an natapnan didto han syudad ngan igindeklarar na han DOH nga natatabo na an Community Transmission tungod kay deri na natutudlok an mga nagpapakatapon han kagaw.
Nadugangan gihapon hin 12 nga kaso an Basey, Samar ug ngatanan ini pinaagi han Local Transmission. Pito an bag-o nga natapnan ha Villareal ug tanan Close Contacts han mga naha-una nga natapnan.
An Tacloban in mayda naman 10 nga bag-o nga kaso sanglit umabot na ha 247 an kabug-usan nga nagpositibo dida han syudad.
Siyam nga pasyente an kadugangan ha Ormoc ngan 109 na ngatanan an nagkatatapnan nga Ormocanon. Ha luyo nga bahin, upat an nahidugang ha probinsya han Biliran kun diin 70 na ngatanan an kaso, 54 an naka-recover ngan 15 an Active Cases.
Sobra hin 20 nga mga Locally Stranded Individuals an nagkatatapnan dida han report kakulop ngan tikang hira hin magkalainlain nga bungto ha Leyte, Southern Leyte ngan Biliran.
Pito nga Health Workers an nagpositibo ug dara hini, umabot na ha 270 an mga nagtatrabaho ha hospital ngan Rural Health Units an nadarahigan han virus. #
