Isumat.com/9:57AM, August 28, 2020
Mahugot nga ginkondenar han DOH-Treatment and Rehabilitation Center an natabo nga brutal ngan waray hangkag nga pagpatay han duha nga ira mga Out-Patients pira na ka adlaw an nakalabay.
Kun manunumduman, an magtala-amay nga hira Pio ngan Ylphi Penaflor an pinanmusil ngan nagkamamatay ha Brgy Sta Cruz, Palo, Leyte pira pala ka adlaw an nag-agi. An mga biktima in mga residente han Brgy Mag-aso, Jaro, Leyte.
Sumala han DOH-TRC nga namumutang ha Dulag, an magtala-amay nga Penaflor in tipakadto na unta ha Dulag para han ira pinal nga eksaminasyon han Out-Patient Services Program. Nakatalaan nga mag-gradwar na unta an mga biktima han proseso han rehabilitasyon.
Nagsering pa an DOH-TRC nga waray nagin problema ngan nagin masinugtanon an magtala-amay han mga patakaran. Iginpakita gihapon nira an ira tim-os nga hingyap nga magbag-o na tikang han paghilambigit ha iligal nga droga.
Nabibido an ahensya tungod kay nawarayawan oportunidad an mga biktima nga magbag-o. Igindugang pa han DOH-TRC nga kawang la an kwarta ngan paningkamot han gobyerno nga gingamit para han rehabilitasyon. Iginpa-abot gihapon han ahensya an ira simpatiya ngadto han pamilya han mga biktima.
Hira Pio ngan Ylphi in ginpa-arakan hin bala alas 7 han aga samtang nagbabaktas hira didto han lugar han insidente. Tikang hira ha Jaro ngan humaw-as ha Palo basi sumakay na liwat tikadto ha TRC-Dulag.
Tulo nga suspetsado nga sakay hin itom nga SUV an nagpanmumusil han magtala-amay rason han ira kamatayon. Katapos han pamusil, naka-eskapo dayon an waray panhikilal-i nga mga suspetsado. An mga kapulisan in padayon pa nag-iimbestigar han panhitabo.
Hira Pio nga Ylphi in nadakop na hadto kasumpay han iligal nga droga ngan nagpapa-ilarum han proseso han rehabilitasyon. #
