Isumat.com/7:23AM, August 31, 2020
Arestado an usa nga babaye dida han gindumara nga drug buy-bust operation han mga tinubyanan han balaud pasado alas 3 han kulop (Agosto 30) ha Brgy Looc, Cabucgayan, Biliran.
Ginkilala an suspetsado nga hi Krystal Amistoso, 24-anyos, waray asawa, ngan residente ha Brgy Langgao. Hi Amistoso in nagsurender na hadto ha mga otoridad han magtikang an Oplan Tokhang tungod han iya kalambing ha iligal nga droga.
An mga operatiba han PDEA ngan Biliran PNP Provincial Office an nagdumara han operasyon ug ira nakumpiskar in tulo ka sachet hin gin-aalegar nga shabu balor hin 7 Mil Pesos. Nagpahayag an mga otoridad nga an suspetsado in usa nga High-Value Target.
Mahugot naman nga igindiwara ni Amistoso an akusasyon han mga otoridad. Sumala ha iya, deri tikang ha iya an mga gintutudlok nga droga kay iya na iginsalikway ini nga aktibidad han magsurender hiya upat na ka tuig an nakalabay. An mga otoridad in nakatalaan magsampa han kaangayan nga mga kaso kontra han suspetsado.
Ha iba naman nga notisya, usa an patay ngan usa an samaran han magsampakay an duha nga motorsiklo ha Brgy Enage, Biliran, Biliran alas 8 an oras kagab-i.
An mga imbestigador an nagkilala han namatay nga hi Warren Pinon, residente han nasabi nga barangay samtang an nasamaran hi Ganti Carbo nga taga Brgy Sangalang.
Hapagkayana, padayon pa an imbestigasyon agud matudlok an rason kun kay-ano nga nagbangga-ay an duha nga motorsiklo. #
