Isumat.com/7:30AM, July 7, 2020
Usa nga sundalo an namatay ngan usa gihapon an nasamad dida han agway ha butnga han mga tropa han gobyerno ngan rebelde nga mga komunista ha Brgy. Canvais, Motiong Samar hadin nakalabay nga adlaw.
Subay han report nga nahikay han Isumat.com, iginkahibalag han mga kasundaluhan nga kaapi han 14th Infantry Battalion an mga rebelde ngan nagkaada hin 10 minutos nga balyu-ay hin bala. Kataliwan han agway, kumalagiw hin kadagmitan an mga rebelde.
An mga kasundaluhan in nagdudumara hin Community Support Program dida han lugar han matabo an engkwentro.
Nagbilin an enkwentro hin patay ha panig han gobyerno ngan ginkilala ini nga hi Private 1st Class Tejeras. Nahisumat nga labot la han igo hin bala, gintigbas pa ngan gin-ikasurunog an lawas han sundalo han mga NPA. Nag-antos naman hin kasamdan hi PFC Baybayon.
Hapagkayana, nagdudumara an miiitar hin paghalpat han grupo nga ira iginka-enkwentro.
Kun aton manunumduman, hadton Mayo tulo nga rebel returnees dida han nasabi nga barangay an ginkidnap han mga rebelde. Tobtob yana, waray pa kasasabti kun ano na an natabo han mga returnees.
Nanginyupo na an pamilya han mga rebel returnees ug an LGU-Motiong ha NPA nga igbalik nga buhi an ira ginkidnap basi mahipadayon an ira mahimyang nga kinabuhi ha katilingban. #
