Isumat.com/4:00AM, July 7, 2020

Nahipatik kakulop (Hulyo 6) an gidadamu-i nga naka-recover nga COVID-19 Patients ha Eastern Visayas. An DOH Regional Office in nagpasamwak nga 97 nga pasyente an nakatalwas tikang han virus.

Tungod hini, umabot na ha 476 an recoveries ngan ini in 80 porsyento han 590 nga nagpositibo han kagaw ha aton rehiyon. An mga Active Cases hapagkayana in aada nala ha 111 ngan nagpapabilin ha tulo ka tawo an namatay tungod han corona virus. Mayda naman siyam katawo an bag-o nga nagkatatapnan.

An Ormoc City in pira la ka oras nga nagin COVID-Free. Kakulop han udto igin-anunsyo han syudad nga naka-recover na tanan an 57 nira nga pasyente, pero paghagos la hin pira ka oras, iginreport han DOH an tulo nga bag-o nga kaso han syudad. Waray maghatag hin detalye an LGU han bag-o nga mga kaso labot la han pagsering nga aadto hira ha Isolation Facility ngan maupay an kahimtang han panlawas.

Duha gihapon nga kaso an nahidugang ha Capoocan, ngan usa ha Matalom, Leyte. Waray pa iginpagawas nga impormasyon an nasabi nga mga LGU han ira bag-o nga mga kaso tobtob ginsusurat in inga notisya.

Usa naman nga Locally Stranded Individual tikang ha Cebu an bag-o nga kaso ha Albuera, Leyte, samtang an bungto han Leyte, Leyte in may bag-o nga nagpositibo ug hiya in 52 anyos nga construction worker tikang ha Paranaque.

Usa gihapon nga Positive Case an nahidugang ha Basey, Samar.

Dida han 590 nga nagkatatapnan ha bug-os nga rehiyon, 370 hini an mga LSI , 104 an health workers, 49 an OFWs, 3 an Balik-Probinsya ug an iba Local ngan Community Transmission. #