Isumat.com/4:05AM, July 25, 2020
Deri kalilikyan nga may mga paki-ana an publiko kasumpay han tulo nga bag-o nga kaso han COVID-19 ha Eastern Visayas nga iginreport kakulop (Hulyo 24) han DOH Regional Office.
Dida hini nga report, an tulo nga bag-o nga kaso in ginlalakipan han duha nga menor de edad nga mga residente han Kananga, Leyte ug an 22-anyos nga babaye nga taga Tacloban City.
Sumala han impormasyon nga iginhatag han LGU-Kananga, 11- anyos ngan 13-anyos nga magbugto an bag-o nga pasyente han bungto. Hira in umabot tikang ha Makati hadton Hulyo 16, 2020. Kaupod nira han pagbalik ha Kananga an ira kag-anak ngan usa pa nga bugto.
Pag-abot nira ngadto han bungto, iginderetso hira ha Municipal Quarantine Facility. Hadton Hulyo 23, ginkuhaan hin swab samples an bug-os nga pamilya, ngan kakulop gumawas an resulta. An duha nga magbugto nagpositibo, samtang an kag-anak ngan usa pa nga bugto negatibo han corona virus.
Kun amo ini an resulta, malutaw yana an paki-ana kun kay-ano nga an magbugto la an positibo ha luyo nga mag-urupod man pagbiyahe an bug-os nga pamilya ngan magka-urusa hira ha kwarentina? Hin-o an nakatapon han magbugto?
Hapagkayana, ini nga maggbugto in waray iginpapakita nga sintomas han sakit ngan iginbalhin na ha Isolation Facility han LGU upod an ira kag-anak ngan usa pa nga bugto. An Kananga in mayda walo nga active cases han COVID-19 hapagkayana nga mga panahon.
Ngadi naman kita han bag-o nga natapnan nga Taclobanon. Subay han report han DOH, an 22-anyos nga babaye in close contact ni Eastern Visayas Patient-724 nga 62-anyos anyos nga babaye gihapon. Dako an posibilidad nga magka-usa hira hin balay, pero waray kumpirmasyon mahitungod hini.
Hadton Mierkules, nagpahayag an City Health Office nga an 62-anyos nga babaye in nagtarabaho ha gobyerno, pero waray impormasyon kun ano nga opisina ngan waray liwat pahayag kun diin nga lugar possible hiya natapnan.
Kagab-i nagpahayag an City Government nga magpapatuman hin “Zonal Containment” didto han barangay nga gin-uukyan han duha nga pasyente. Ini nga pitad in agud makagdumara hin contact tracing ngan swab testing han mga indibiduwal nga iginka-urusa han duha nga pasyente. Waray liwat impormasyon kun diin ini nga barangay.
Hapagkayana, mayda na 760 nga natapnan ha Eastern Visayas ngan 644 an nakarecover (84%). Aada ha 113 an active cases ngan nagpapabilin nga tulo an namatay tungod han COVID-19. #
