Isumat.com/5:00AM, July 12, 2020
Duha nga Frontliners ha Eastern Visayas an natapnan han COVID-19. Hira in lakip dida han 21 nga bag-o nga Positive Cases nga iginreport han DOH Regional Office kakulop (Hulyo 11).
An usa in PNP personnel nga taga San Sebastian pero naka-destino ha Paranas, Samar ngan adto gihapon hiya ha Paranas naka-isolate; an usa naman in nagtatrabaho ha Salvacion Oppus Yniquez Memorial Provincial Hospital ha Maasin City. Hira ngaduha in maupay an panlawas ngan waray iginpapakita nga sintomas.
An bungto han Bontoc, Southern Leyte an nag-antos han damo nga natapnan kakulop kay upat nga ira residente an nagpositibo. Tulo ha ira an mga Locally Stranded Individuals tikang ha Cebu, samtang an usa naman in OFW.
Usa naman nga LSI an bag-o nga kaso ha Pintuyan, Southern Leyte. Tikang ha Taguig City an 19-anyos nga lalaki. An syahan nga duha nga kaso ha Pintuyan in naka-recover na. Ddito naman ha Tomas Oppus, LSI gihapon an nagpositibo kakulop, pero an LGU in nagsering nga talwas na hiya han infection kay natapos na an 21 ka adlaw nga kwarentina ngan waray sintomas han virus. An LGU-Hinunangan in waray pa maghatag hin impormasyon han ira bag-o nga kaso.
Ha Kawayan, Biliran an bag-o nga pasyente in taga Brgy Poblacion nga umabot tikang ha Manila.
An duha nga bag-o nga kaso ha Northern Samar in nagkatatapnan han naha-una nga mga nagpositibo. Ha bungto han Lavezares, an natapnan in 14 anyos nga apo ni Eastern Visayas Patient 560 nga tikang ha Manila; samtang ha San Jose hi EV Patient 532 in nakatapon han iya 60-anyos nga mister.
Ha San Jorge Samar, an bag-o nga nagpositibo in 25-anyos nga lalaki tikang ha Pasay City nga umabot ha ira bungto hadton Hunyo 24 sakay hin pribado nga behikulo. An naha-una nga tulo nga kaso ha San Jorge in naka-recover na.
An bag-o nga kaso ha Palo in usa nga LSI tikang ha Cebu. Tikang gihapon ha Cebu an bag-o nga pasyente han Alangalang. Didto ha Mahaplag, an bag-o nga natapnan in 21-anyos nga babaye tikang ha Cebu.
An bungto han Bato may duha nga bag-o nga kaso ngan hira in mga LSI tikang ha Manila. Usa naman an nadugang ha Jaro pero waray pa detalye tikang ha LGU. Nahipatik an gisasyahani nga pasyente han COVID ha Inopacan, Leyte ngan hiya in Senior Citizen tikang ha Manila ngan waray iginpapakita nga sintomas.
Mayda gihapon bag-o nga kaso an Basey, Samar, ngan hiya in 62-anyos nga babaye tikang ha Quezon City nga umabot ngada han bungto hadton Hunyo 19. Iginbalhin hiya ha EVRMC tungod kay labot la nga Senior Citizen hiya, mayda niya asthma ngan diabetes.
646 na an nagkatatapnan han virus ha Eastern Visayas ngan 535 o 82 porsyento an naka-recover. #
